Lo XXIII vers d'en Gr. Riquier, l'an MCCLXXXVII, en decembre

No puesc per ren
lo ben
que conosc far,
ni ges no puesc al contrari fugir;
ni·m puesc del tot a vertat acostar,
ni aitam pauc abstener de mentir;
ni puesc tener lo camin que deuria
e vau soven lai on ops no m'auria;
don desservisc leyal senhor veray,
per seguir un fals e mal que·m dechai.

E sai que ren
de ben
no·m pot donar
le mals, ans crey tot cert que·m vol aucir,
e·l bos senher, si·m vuelh, vol me·n gardar,
e·m vol far ric a mo voler complir;
donc si del mal tenc derenan la via,
ma folhors er trop piegers d'aurania;
per que, si puesc, mo voler no creirai,
quar sens me·n deu desviar, si ges n'ai.

Mos sens per ren
del ben
no·s deu cessar,
contra·l voler que·m fa mals abellir,
quar mos sens deu mo folh voler sobrar
e·l bes lo mal per razon, so m'albir.
Mas selh que tot pot e tot sap, me·n sia,
si·l plai, guida, qu'estiers far no·s poiria,
tant ai seguit mo folh voler savay,
qu'a ma razon ez a mon sen desplai.

Qui vol far ren
ses ben,
deu albirar
lo mal e·l dan que li·n pot avenir,
e deu ab sen, voler apoderar,
quar de mal far se deu pena seguir
e de ben far meritz, qui no·l cambia.
Mas el merit de Dieu hom no·s fadia:
donc per ben far podem tug esser guai,
per lo mal, marrit per totz temps may.

Mas una ren
el ben
continuar
truep: que no·y deu esperansa falhir;
ez un'autra el mal dous permenar,
que·l peneden fa temoros tremir
quan ab afan, ben fazen se·n desvia:
pero bes l'es! Mas magers li seria
bes far ses mal, qu'apres mal bes, so sai,
mas de quascu salvacïos s'eschay.

De Belh Deport, de gaug, de manentia
pot esser ferms, si tot s'es aspra ·l via,
selh que layssa l'escur e sec lo rai
de la via qu'al tot poderos play.

Gracïoza Verges, sancta Maria,
maires de Crist filh de Dieu, nuech e dia
prega per nos lo teu sanct filh veray,
que·ns endresse al regne seu sanct gay.

Per tu, Dona, esper que cobrarai
so que perdut per mo falhimen ay.