Maigret, pujat m'es el cap
so qu'ins el ventre no·m cap.
Bos etz per listr'e per drap
mas, qui be·us quer ni·us esterna,
trobar vos pot, si no·us sap,
pres del vaysselh ab l'enap;
qu'ades tendetz vostre trap
lai on sentetz la taverna.

Guillem Rainols, a mescap
metrai mos motz que ar rap
de tal luec, e trop no·m gap,
on non vuelh lum ni lanterna
e si eu a vilans escap,
si que negus no m'atrap,
donc tenc lo parlar per gap
e·n talant ai que·us esquerna.

A penas hi truep que·y lim
merce d'en Bernat Razim,
Maigret, que·us ten sec e prim
en estiu e quant yverna.
E·us ai vist un tal noyrim:
los varos qu'avetz el sim
que·us fan plus lag de Caym
e·us reverson la luzerna.

Guillem, de la claustra·us vim
yssir enseint ab un vim
e s'ieu de vos no·m escrim
non vuelh mais beur'ab Maerna;
qu'anc, pus nos enioglarim,
vos ni yeu, non sai auzim
tan bos motz ni qi meillz rim
cum vos, don l'arma s'enferna.

Adug vos an a derroc,
Maigret, dat putans e broc:
quascus i fes so que poc,
e·l foudatz que vos governa!
Ioglar vielh, nesci, badoc,
si mais voletz qu'om vos loc,
chantatz cum l'autre mairoc
de Mainier e d'Audierna!

Per nos laissetz vostre floc
et avetz el suc maynt loc,
Guillem, don a meyns maynt floc,
cara de boc de Biterna!
E no·us cugetz que·us hi toc
qu'anc iorn pipidon no·n moc,
que no·y ac pel cui no·y ploc.
E tenetz dreg vays Salerna!

Maigret ben saup selh que·us moc
del senrier detras lo foc
qual val mais odor de broc
contra sabor de sisterna!

Per so no·us cuietz que·us tot
en Rossinier, nas de croc!
Mas tornatz en vostre loc,
on portavatz la lanterna!