Totz tos afars es nienz,
Peir Raimonz, e·l sens frairis;
E non val dos anjevis
Tos sabers mest bonas genz;
E tenc per desconolscenz
Qi be ni honor ti fai;
Et sapchas qu'ieu non darai
Per nuil mestier qu'en tu sia,
Mais qar venguist per mi sai.

Seigner, flacs e recrezens
Estatz mest vostres vezis,
E sofranh vos pans e vis
E fail vos aurs et argens;
E·l meus mestiers es valenz
Si·l vostre dig son savai;
E s'ieti ja ren de vos hai,
Jamai en home qi sia
A mon jor no faillirai.

Peire, mal m'avondet senz,
Qar de tenzo vos comis;
Qe·l vostre mestiers es fis
E vos etz bons e plazentz;
E·l vostre arezamentz
Es grans e·il chantar son gai;
E negus joglars non vai
Qe plus tard fezes follia
Ni plus tost fezes bon plai.

Tant es larcx e conoissenz
Qe tot l'aver de Paris
Darias en dos matis;
E plai vos Jois e Joventz,
Seigner; e·l vostre ardimentz
Es grantz on faitz maint assai;
E plus franc de vos non sai,
E s'ieu mal dig vos avia,
Tot sabchon qe mentit n'ai.

Vejas del tafur dolentz
Qe·s cuidet q'eu l'esqarnis
E qe·il lauzes e·l grazis
Sos malvais captenemenz;
E s'anc li passet las dentz
Bos motz, a negun jor mai
Ja cella que am no·m bai;
E si·m dis mal per feunia,
Perdon lo, qar s'en estrai.

Chaitivez'e marrimenz
Es tot l'an en vos assis;
E qi·l vostre fag resis
Mentau e·ls envelzimentz,
Ben par com es conoiscentz,
Ni qi·us honra qe·l meschai;
Qe·us onrei tant qe·m desplai,
Et on plus vos honraria,
Adoncs i perdria mai.