Guiraut, pus em ab senhor cuy agensa
joy e solatz, e·l play que fassam tensa,
respondetz mi segon vostr'en[ten]densa
d'un cavayer, c'amet lonja sazo
dona que·l plac mais que res, ses falhensa,
tan que·l colquet ab si tot a bando:
de cal dec aver may bona sabensa,
cant si colquet o cant levatz en fo?

Folquet, qui a razon e conoissensa
sap que plazers es magers en prezensa,
per que conois que·l colcars de plazensa
dec bo saber al cavayer, e no
ges lo levars, s'amors ni bevolensa
lo y amenet; ans fetz gran falhizo,
si del levar ac plazer, car parvensa
fes qu'el jazers se tengues a prezo.

Mal avetz pres, Guiraut, al mieu vejaire,
d'est partimen, cossi pogues retraire
que mais deia plazer so qu'es a faire,
que cant hom a complit son dos dezir.
May val fis joys, cant es pres a gran aire
de so c'om vol may que res possezir,
que no fai sel de c'om se pot estraire:
per que·l levar dec may l'amans grazir.

D'aquel plazer sos espers fa maltraire
e·l penr'es gaug, c'om maior non sap gaire,
mas pus es pres, nulhs homs no·l pot atraire
ab bon saber mas cant del sovenir,
Folquetz, e vos no semblatz fis amayre,
cant del levar mandatz l'amans jauzir,
que·l dec esser pus greu que mort de paire:
mal razonatz, e pieitz saupes partir.

Guiraut, vers es que sofre malanansa
sel c'aten joy tro que·l pren ses duptansa,
per c'al levar dec aver alegransa
lo cavayers mays que cant l'ac colcat
sidons ab si, et es mielh de semblansa
c'ap lieys agues son plazer acabat
que can si mes; et aves ses esmansa
pres e cauzit, si c'om vo·n te per fat.

Endreg d'amor razonatz gran erransa,
Folquet, don par c'anc no·us tenc en balansa,
car joys d'amors non a nulh'acabansa
ni·s pot complir per ren mas per desgrat.
Mas si·l vostre pec razonars s'avansa,
dona non deu far mais aman paguat,
car l'amans dec de colcar gran pezansa
aver, si·l plac lo levar, per vertat.

Per lo comte de Cumenge, qu'enansa
fina valor, vuelh que sia jutjat,
Guiraut, qu'el saup que fon lial amansa,
mas paor ay que·l sia oblidat.

Folquetz, no·m fay lo jutjamen doptansa,
qu'ieu razoni ver e sera proat,
que·l coms a de tot cant saup membransa,
e non dira per ren mas la vertat.