[Guillem]
De so don yeu soy doptos
me diatz vostr'entendensa,
Guiraut, pus es amoros:
a razon ni conoisensa
l'amors don vos aug parlar?
Car mosenhor n'aug clamar,
que ditz c'un an l'a o dos
servida, que non l'es pros.

[Guiraut]
Dezirs, on non cap razos,
es m'amors, que·m par que·m vensa,
Wilhem; mas meravilhos
soi de monsenhor si tensa
ab Amor ni·n vol clams far.
E mosenhe·n Marques guar,
si·l clam no fay, si·n deu vos
blasmar: car l'us faih d'abdos.

[Guillem]
Vostr'amors vos fay ginhos,
Guiraut, don avetz sciensa;
mas Guilhem men, lo gilos,
qu'ieu anc no fis tal falhensa
que·m clames d'autrui afar,
ans dey vostr'amor lauzar,
car n'auzem vers e chansos.
E·n Marques blasme·l per nos.

[Marques]
Vos, en Guiraut, es picos,
e Wilhem non a sabensa
d'amor, per que·y cap perdos,
sol qu'en d'enjan penedensa
es ne vuelha cofessar;
car trop poiratz aprimar
sas peguas entensios,
don rizem mantas sazos.

[Guillem]
Guiraut, pecx es lo respos
c'avetz fag: c'Amors agensa
e val car es bon'als bos.
Mas anc non l'ac en tenensa
mosenher, ni vos, so·m par,
ni mosenhe·n Marques, car
no faitz nulh fag cabalos,
ni·m dizetz ditz amoros.

[Guiraut]
Anc hom no fon poderos
d'Amor, ans, a ma parvensa,
pren e met en sas prezos
home cant d'amar comensa.
Wilhem, no·us puesc castiar;
fassa mosenher estar,
et mosenhe·n Marques, jos
vostre parlar rovilhos.

[Enric]
Guiraut, trop es cavilhos
a Wilhem, per ma crezensa;
e·n Marques es l'enujos,
car sa pegua captenensa
no·l deuratz tant esquivar.
No·l vos laisarai cassar,
si tot m'es fort nelechos.
E remanha la tensos.

[Marques]
Car es tan contrarios,
senher, faitz gran descrezensa
a Wilhem que·us ten joios
dizen pecx ditz ses valensa.
E·n Guiraut fai a reptar
que·l cuj'al sieu sen tornar;
et auriatz mil bastos
fratz enans qu'el a tal fos!

[Guillem]
Totz tres vos fay desviar
no saber de respost far
que fos avinens e bos;
mas no·n val mens ma razos.

[Guiraut]
Guilhem, be·us aug pegueiar;
et ab qui cujatz parlar?
No say sie·us parlatz ab nos,
mas al parlar semblatz tos.

[Enric]
Guiraut, trop auram que far
Si·l cujavam esmendar
sos pecx ditz pauc cabalos;
qu'ieu l'enten mens que·ls Grifos!

[Marques]
Senher, er layssem estar
Wilhem que fay·m dessenar
que faydiria·s de nos;
e val tan pauc per qu'es blos.