Lo pair'e·l filh e·l sant espirital
entre totz tres, e vos verges Maria,
nos gart, si·lh platz, del mal fuec ifernal
e del turmen, que no falh nueg ni dia,
e que fassam tot lo sieu mandamen,
si que venguam joyos e resplanden
el sieu regne, aissi cum resplan l'alba.

Los archangels e·ls angels atretal
e totz los sans, don la cortz es complia,
preguon per nos del falhimen mortal
que·l nos perdon lo filh, reyna pia,
selh que per nos sufric mort e turmen
e passio, so sabem veramen,
e de si eys nos fe clardat et alba.

Dieus, vostr'amor e·l gaug celestial
e la doussor de la vostra paria
nos gui e·ns gar, e nos que siam tal
que capiam en vostra companhia,
e que vas vos no fassam falhimen,
ans vos amem de bon cor leyalmen,
si que su·l cel nos mostretz la vostr'alba.

Be·m meravelh car tug non em aital
co·l senhor rey nos braila e nos cria
c'ades nos di c'anem recebre tal
gaug qu'el nos te aparelhat quec dia;
don casti ieu car non anam corren,
car no sabem de la nueg cora·ns pren
ni se·ns venrem en loc on veyam l'alba.

Selh que per nos det son sanc natural
e se liuret e se mes en baylia
et en la crotz fon levatz atretal
e clavellatz e coronatz d'espia,
nos don a far qu'al jorn del jutjamen
los nostres tortz no·l sia·n remembramen,
ans ab gran gaug nos men en la sua alba.

Belh'estela d'Orian, Dieus vos sal,
tug preguem Dieu que nos don bon ostal
en paradis, on es clars jorns et alba.