Lo primier vers de Gr. Riquier, l'an MCCLXI

Ab lo temps agradiu gai
le cors nueus blons, de bon grat,
qu'ieu am, a mon cor comes
de far vers adrechurat;
e far l'ai de mascles motz,
ab tot lo nombre de set
ez ab belh chan plazentier.

Al comensar del vers ai
lo nombre e l'als gardat,
quar hom deu gardar, so·m pes,
ans que comens fag honrat,
si·n pot estar sus o sotz;
per qu'ieu ab mon cor secreth
n'ai avut cosselh plenier.

Lo cosselh tenc per verai,
mas mon Belh Deport amat
dey sopleyar, qu'elh m'a mes
captal on ai gazanhat
saber, don giet brancx e brotz;
d'als no·m valc ni·s ne penet,
per que·m muer de dezirier.

Si·n muer, blasmes no·l n'eschai,
quar, s'ieu l'am, no·m n'a forsat.
Qui·n dey blasmar, si dans m'es?
Non mas mon cor leugier fat,
que fon del mieu turmen glotz;
pero en tal luec [me] trieth,
que m'a fag de frag entier.

Tant suy entiers, que·n murray
aman; ez ai m'acordat
que no·m vir, quar aunitz bes
no val tant de dan honrat.
Per que seray vielhs e rotz
d'aquest sen, tro n'aja veth
forsat del badalh derrier.

Pueys a blasmar no·m faray,
mas si·l Deportz qu'ay celat,
lo qual el mon non a tres
que·l sapchan, non a camjat
son atur, sert er a totz,
que·l sieus durs cors aizinet
com moric Guirautz Riquier.

Vers, quant seras apres, vay
al pro Amalric prezat,
vescomte de Narbones,
qu'elh a bon pretz gazanhat
e·l mante entier ses notz,
don tug sey amic son leth
e·ls autre ab cossirier.

Solatz e chans de bon grat
e conortz cazon en potz
a mos ops, se·m breu no·m reth
mos Belhs Deportz alegrier.