Lo XXVII [= 26°] vers d'en Gr. Riquier, l'an MCCLXXXXII

Be·m degra de chantar tener,
quar a chan coven alegriers
e mi destrenh tant cossiriers,
que·m fa de totas partz doler,
remembran mon greu temps passat,
esgardan lo prezent forsat
e cossiran l'avenidor,
que per totz ai razon que plor.

Per que no·m deu aver sabor
mos chans qu'es ses alegretat;
mas Dieus m'a tal saber donat,
que·n chantan retrac ma folhor,
mo sen, mon gauch, mon desplazer
e mon dan e mon pro, per ver,
qu'a penas dic ren ben estiers,
mas trop suy vengutz als derriers.

Qu'er non es grazitz lunhs mestiers
menhs en cort, que de belh saber
de trobar; qu'auzir e vezer
hi vol hom mais captenhs leugiers
e critz mesclatz ab dezonor;
quar tot quan sol donar lauzor
es al pus del tot oblidat,
que·l mons es quays totz en barat.

Per erguelh e per malvestat
de cristias ditz, luenh d'amor
e dels mans de nostre Senhor,
em del sieu sant loc discipat
ab massa d'autres encombriers;
don par quelh nos es aversiers
per desadordenat voler
e per outracuiat poder.

Lo greu perilh devem temer
de dobla mort, qu'es prezentiers:
que·ns sentam Sarrazis sobriers,
e Dieus que·ns giet a nonchaler.
Ez entre nos qu'em azirat,
tost serem del tot aterrat;
e no·s cossiran la part lor,
segon que·m par, nostre rector.

Selh que crezem en unitat,
poder, savïeza, bontat,
done a sas obras lugor
don sian mundat peccador.

Dona, maires de caritat,
acapta nos per pïetat
de ton filh, nostre redemptor,
gracia, perdon ez amor.