Ades on plus viu, mais apren,
E mais sai de mal e de be,
E meills sai conoisser en me
Et en autrui foldat e sen.
Sel que ditz tot jorn follia,
E si meteis non chastia,
Non obra ges a dreg garan!
Et sil que·m blasmon car non chan,
Degran blasmar los lur faitz deschausitz:
Eu chantera, si chantars fos grasitz.

Qu'eu non chasti ni non repren,
Que chascus sap consi·s capte!
Mais gen fora c'om vis en se
So que conois en l'autra gen.
Mas ben dic que pauc valria
Chans, si d'amor no movia,
Et de mi a passat un an
C'amors no·m tenc ni pro ni dan!
Mas er sui gais, que jois d'amor m'es guitz:
Conven qu'eu chan, c'a dreit port son eissitz.

Qu'amors m'esmenda ben e gen
Los mals qu'eu n'ai suffertz ancse,
C'amar mi fai per bona fe
La meillor e la plus plasen,
E tal c'a en sa baillia
Tot quant eu voill ni queria!
C'anc natura non obret tan
C'altra·n fasses del sieu semblan!
Qu'en leis es jois restauratz e norritz,
Qu'era aillors sordeiatz e faillitz.

Lo cors a gai e covinen,
Entier, que ren no·i descove,
E beutatz no·i va ni no·i ve!
Anz i a fait son estamen.
Jois e pretz e cortesia,
Solatz senes vilania,
Convinenz ditz, e faitz presan,
Sojornon ab leis! et es tan
De totz bos aibs en son gen cors garnitz,
Que totz los mals n'a loignatz e faiditz.

Lo cors, e·l cor, e·l pensamen
Ai en leis que d'als no·m sove,
Ni ja pensar non voill de re,
Mas can del sieu enansamen.
Plus qu'en la mar non parria
L'aiga, qui plus n'i metia,
Non pareis el sieu cors presan
Lo bens qu'eu dic de lei lausan.
Pero vers es so que·l proverbes ditz:
Que bos pretz creis, on plus loing es ausitz.

Domna, no·us prec ni non enten
Que vos m'ametz, ni no·s cove,
Car, sitot cresiatz merce,
Paratges sai que·us mi defen!
Mas d'aisso·us prec, si·us plasia,
Domna, que s'ieu ren disia
Que·us fos plasen ni benestan,
Que de vos fos, e si d'aitan
Me vol honrar vostre gens cors chausitz:
Vos non er dans e·l mieus jois n'er complitz.

Si ja rasos no·m disia
Que de midonz Na Maria
Parles re que fos benestan,
Veritatz mi fai dir d'aitan!
Que·l sieus noms es sobr'autres noms grasitz,
E·il sieu fait son de pretz cims e razitz.