G[uilhem] Raynier, pus non puesc vezer vos,
parlar yeu vuelh; e digatz m'en chantan
d'est partimen, qu'ieu vos meti denan:
cal penriatz per melhor ad estros,
que donzela amassetz lialmen
e non acsetz mas sol l'aculhir gen,
o tal veuza que·us fes tot vostre grat
endreg d'amor? Chauzetz lo pus onrat.

Guiraut Riquier, mays vuelh esser joyos
de donzela que fassa bel semblan,
que can [eu] remir lo cor m'en resplan
sa gran beutat e son pus amoros,
car donzela ama pus coralmen
si tot ades no so fa a parven,
per qu'ieu vuelh mays ab lieys parlar mon grat
que de veuza fezes ma voluntat.

[Guilhem] Raynier, mal paretz cobeytos
de l'onrat joy que tug li fin ayman
enveyan tan, e·n sofron tal afan
que mans n'a mortz, e mi ten cossiros;
c'amar voletz desesperadamen
ab l'aculhir, non-poder vos repren.
Yeu vuelh jauzir so c'ay tant dezirat,
e vos lang[u]etz ab cor desesperat.

Guiraut Riquier, yeu ay mantas sazos
gaug e deport ab lieys on pretz s'espan,
que bel parlar me dona joia gran,
e tenc mon cors alegre e joyos,
e l'aculhir dona·m tant d'ardimen
que no·m menbra degun mal pessamen;
mays la veuza c'a so marit uzat
uzara vos ab sa falsa beutat.

Anc no·us destreys Amors, n'ayman ginhos,
que l'onrat joy sieu metatz en soan
per l'aculhir; es amatz ab enjan
ses tot respieg, e sirvetz en perdos,
G[uilhem] Raynier. Car res no·l falh viven
a sel que pot complir tot son talen,
e si·l veuza blasmatz de falsetat
a l[a] donzela aytal dizetz vilta‹t›.

Trop poyria durar nostra tenso[s],
amicx G[ui]r[autz], et anem no·n layssan,
pero be·us dic que la veuza soan
per l'aculhir, don m'aonda razos,
que·l donzela m'acuelh tan dossamen
c'ap si reten tot mon cor e mon sen,
e pus yeu puesc ab leys parlar mon grat,
del partimen ay tot lo miels triat.

Raynier, chauzit avetz nessiamen;
en Dardasier prec qu'en don jutjamen,
que falhitz es et yeu ay vo·n proat,
car per longuier laissatz joy acabat.

G[ui]r[aut] Riquier, ades mi ten jauzen
la donzela, can vey son bel cors gen;
en Dardassier diga·n la veritat:
cals de nos dos a pres lo pus onrat?