Greu m'es a durar,
quan aug tal descrezensa
dir ni semenar.
e no·m platz ni m'agensa
qu om non deu amar
qui fai desmantenensa
a so don totz bes
ven e nais e es
salvamens e fes.
Per qu'ieu farai parvensa
e semblan que·m pes.

No us meravilhes
negus si eu muou guerra
ab fals mal après
qu'a son poder soterra
totz bos faitz cortes
els encauss'e·ls enserra
trop se fenh arditz
quar de Roma ditz
mal, qu'es caps e guitz
de totz selhs que en terra
an bos esperitz.

En Roma es complitz
totz bes, e qui·l li pana
sos sens l'es falhitz
quar si metels enguana,
qu elh n'er sebelitz,
don perdra sa ufana.
Dieus auja mos precx,
que selhs qu'an mals becx,
joves e senecx,
contra la lei romana,
cajon dels bavecx.

Roma, selhs par pecx
tenc totz e per gent grossa,
per obs e per secx
que lur car e lur ossa
cargon d'avols decx,
don cazon en la fossa,
on lur e sermatz
pudens focx malvatz;
don mais desliatz
no seran de la trossa
qu'an de lurs peccatz.

Roma, ges no·m platz
qu'avols hom vos combata,
del bos avetz patz,
qu'usquecx ab vos s'aflata.
Dels fols lur foldatz
fes perdre Damiata,
mas li vòstre sen
fan sel ses conten
caitiu e dolen
que contra vos deslata
ni renha greumen.

Roma, veramen
sai e cre ses duptansa
qu'a ver salvamen
adurezt tota Fransa,
oc, e l'autra gen
que'us vol far ajudansa.
Mas so que Merlis
prophetizan dis
del bon rei Lois,
que morira en pansa,
aras s'esclarzis.

Piegz de Sarrazis
e de pus fals coratge
heretje mesquis
son. Qui vol lur estatge
ins el foc d'abis
van s'en en loc salvatge
en dampnatio.
A selhs d'Avinho
baisses, don m'es bo,
Roma, lo mal pezatge,
don grans merces fo.

Roma, per razo
avetz manta destorta
dressad'a bando
et oberta la porta
de salvatio,
don era la claus torta,
que ab bon govern
baissatz folh esquern.
Qui sec vostr'estern,
l'angel Michel lo·n porta
el garda d'ifern.

L'estiu e l'yvern
deu hom, ses contredire
Roma, lo cazern
legir, si que no·s vire,
e quan ve l'esquern,
cum jhesus pres martire,
albir se lo cas
si·s bos crestias,
..................
s'adoncx non a cossire,
totz es fols e vas.

Roma, lo trefas
e sa leis sospechoza
als fols digz vilas
par que fos de Toloza,
on d'enjans certas
non es doncx vergonhoza.
Ni ans de dos ans
mas si·l coms prezans
cove que·ls engans
lais e la fe duptoza
e restaur·els dans.

Roma, lo reis grans
qu'es senhers de dreitura
als falses Tolzans
don gran malaventura,
quar contra sos mans
fan tan gran desmesura,
qu'usquecx lo rescon,
e torbon est mon
el comte Raimon,
s'ab elhs plus s'asegura,
no·l tenrai per bon.

Roma, be·s cofon
e val li pauc sa forsa
qui contra vos gron
ni bast castelh ni forsa
quar en tan aut mon
nos met ni no s'amorsa
que dieus non recort
son erguelh e·l tort
..................
don pert tota s'escorsa
e pren dobla mort.

Roma, be·m conort
quel coms ni l'emperaire,
pueis que son destort
de vos, non valon gaire,
quar lur fol desport
e lur malvat vejaire
los fatz totz cazer
a vostre plazer,
qu'us nos pot tener,
sitot n'es guerrejaire,
non li val poder.

Roma, ieu esper
que vostra senhoria
e Fransa per ver,
cui non platz mala via,
fassa dechazer
l'erguelh e l'eretgia,
fals heretges quetz,
que non temon vetz
ni creja·ls secretz,
tan son plen de feunia
e de mal pessetz.

Roma, be sabetz
que fort greu lor escapa
qui au lor decretz,
aissi tendon lur trapa
ab falses trudetz
ab que quascus s'arrapa.
Totz son sortz e mutz,
qu'el lur tolh salutz,
don quecx es perdutz,
qu'ilh n'an capelh a capa,
e remanon nutz.

Chauzitz e sauputz
naisson senes falhida
crematz e pendutz
qu'en lur malvada vida
anc negun vertutz,
car fe no i es auzida
non avem sivals.
E si fos lejals
lor vida mortals,
dieus crei l'agra eissauzida,
mas non es cabals.

Qui vol esser sals,
ades deu la crotz penre
per heretges fals
dechazer e mespenre,
que·l celestials
hic venc sos bras estendre
tot per sos amicx
e pus tals destricx
pres, ben es enicx
selh que non vol entendre
ni creire·ls chasticx.

Roma, si pus gicx
renhar selhs que'us fan onta
al sant esperitz
(quant hom lor o aconta
tan son fol mendicx
qu'us ab ver no s'afronta)
no·i auras honor.
Roma, li trachor
son tan ple d'error
qu'on plus pot, quascus
quec jorn sa folor monta.

Roma, fol labor
fa [qui ab] vos tensona,
de l'empe [rador
dic, s']ab vos no s'adona,
q'[en gran ] deshonor
ne venra s[a corona
e] sera razos
mas per [ o ab vos
leu] troba perdos
qui g[en sos tor]tz razona
ni n'es an [goissos].

Roma, l'glorios
que a la Magdalena
perdonet, don nos
esperam bona estrena,
lo folh rabios
que tans ditz fals semena,
fassa d'aital for
elh e son thezor
e son malvat cor
morir e d'aital pena
cum heretjes mor.