Lo XVI [= 15°] vers d'en Gr. Riquier, fach en l'an MCCLXXXIIII, en jenovier

Qui·s tolgues
e·s tengues
dels mals en que cossen,
e fezes
totz los bes
que conoys ez enten,
res non es
que nogues
d'anar a salvamen
als repres
on la fes
es de Dieu, que·ns aten
qu'a bon port nos traisses,
sa merce prometen.

Prometen
don valen
trobam Dieu tan cortes,
que fazen
e dizen
so que crezem que ·l pes,
que·ns defen
a prezen,
e sos mans non faym ges!
No·ns car ven,
ans, sufren
espera que·ns agues
penedens humilmen,
quar nos fes e·ns conques.

Be·ns conques
quar mort pres
per son poble dolen,
que vengues,
si·s volgues,
a luy sals peneden;
que·l paires
premiers fes
Adams un falhimen,
don fon mes
sos heres
en yssilh mot cozen,
tro que Dieus sa trames,
qui·ns rezemet moren.

Mas moren,
mal viven,
cazem totz jorns el bres,
en que·ns pren
desceben
l'Enemicx de mals ples
que·ns apren
e·ns essen
a son vol de ben des,
don tot len
al arden
fuec nos mena espes;
e selh que li conten
es en Dieu ben apres.

Ben apres
es, que res
no·l falh, sel que·l desmen;
quar sotzmes
demanes
es l'Enemicx ses sen,
qu'a perpres
totz mals ves,
per que fug mantenen
quan sos pes
es entes
e tengutz a nïen;
e crey que Dieus endres
aquelh afortimen.

Quar mals es
tant apres,
volgutz, faitz per la gen,
e tan pauc amatz bes,
nos ten Dieus en turmen.

Narbones
es malmes
e blasmatz per nonsen
ez er pus, si merces
de Dieu no· y val breumen.

Pus es grieus per un tres
lo mals que hom no·l sen.