Non ha tan poder en se
cel qui ve vostras faisos
qe mais non i aiatz vos,
dompna, qan ven al partir.
Qar tan sabetz far e dir
d'avinen so qe plai als conoissenz
en maneira qe vos non valez menz.
Qe vostre son cill qui vezer vos van,
seguen lor pro e ses tot vostre dan.

Aissi avetz vos pres me
com los autres en perdos
ab vostres ditz amoros;
q'als non pot hom conseguir
mas lo vezer e l'auzir:
e·l vezers es e l'auzirs tan plazenz
qe non es hom de preiar sovinenz.
Qe pagatz es cel que·us estai denan,
qu'als no·il detz vos ez el qu'als no·us deman.

E pos Deus aital vos fe,
par que·us fos per Lui datz dos.
Qe chascus fo·s enveios
de vos amar e servir
e mostra·us en car tenir.
Az aisso·us fai socors sabers e senz
ab qe pagatz aissi los entendenz.
Qu'ab plazenz ditz ez ab faitz alongan
n'avetz mais grat que cellas qe plus dan.