Era, quan l'ivernz nos laissa
e par la fuoill'en la vaissa,
e ill auzellet chanton, c'uns non s'en laissa,
fas sirventes ses biaissa,
mas uns malastrucs m'afaissa
quar ab joves no·s ten (Dieus li don aissa!):
mais pretz una vieilla saissa
que non a ni carn ni craissa.
Mal ai'er el os e daval la madaissa!
Que la genta, covinenta, on bos pretz s'eslaissa,
fina, franca, fresca, blanca, don jois no·s biaissa,
mais la vuoill, si gen m'acuoill ni josta se m'acaissa,
que la rota que·m des tota Limoges e Aissa.

Per Crist, fort mal s'aconseilla
drutz qu'ab vieilla s'apareilla:
assatz ve menz que selh que no·s reveilla;
son drap nou camja per peilla
e son caval per oveilla
e laissa vin e beu aiga de seilla.
Qu'eu fatz de lor ma correilla
e tenc m'o a meraveilla
de la color que·s fan blanca e vermeilla
ab l'englut d'un ou batut, que·s met viron l'aureilla,
del blanquet, que puois si met et essug'e soleilla,
del tifingon, del mentiron, entro sobre l'aisseilla.
Puissas par, apres pissar, c'adescz veingna de vieilla.

Ai las, tan mal s'i barata
drutz qu'ab vieilla s'acoata!
Eu no l'en planc, que sel s'ausi e·s mata.
Que vieill'es de mal escata
e drutz que lonc si s'aplata
el eis si·l coill lo ram ab c'om lo bata.
Quar, se·s viest jen ni s'afaita,
ni·l drap son nou d'escarlata,
dejos non a nien mas la pel legata.
Mais vuoill dar e baratar, entro a la sabata,
per la bella sotz gonella, que no·s desbarata,
ni aver tot lo poder del rei de Damiata;
qu'eu ja don per sec talon jenoill grais, cueissa plata.

Ben a de sen gran sofracha
drutz que de vieilla s'enpacha;
que mout son feras qui ben las aguacha.
Mil sols metri'ad estracha
que domna joves ben facha
val cinq cenz vieillas neis s'era contracha
.....................
En Bertranz men coma gacha,
e volria n'agues la testa fracha,
puois parlar l'aug del manjar ni de bon'osta·l tracha.
Al jazer compra·l ben ser tot lo porc e la vacha,
quar s'embarga en la pel larga, que es molla e flacha.
Semblanz es, quant hom l'ades, qu'anc no·n trais sa garnacha.

Eu tenc ben drut per fachura
que ama aital penchura:
ren als no·i a mas quan la vestidura.
E tenc m'a gran desmesura
que puois domna desfegura
quar ja i fai muzel ni armadura.
Mas prezes de si tal cura
per que l'arm'estes segura,
que·l cors desvai a totz jornz e pejura.
Eu lor dic aquest prezic per gran bonaventura.
En Bertran vei a lor dan, e par que per fraichura
cad'aver, las, i esper e soffre et abdura.
Mi que·n cal s'a leis va mal, quant estauc latz la dura?