Guilhem de Mur, chauzetz d'esta partida:
essems irem tostemps mays cortz siguen,
e l'us creys se de bon grat doblamen,
mas a sos dos non l'er de creiser guida;
l'autre creys se doblamens en dos,
mas a son grat non er melhurazos.
Eras parra com er per vos chauzida
la melhor part segon la vostra vida.

Guiraut Riquier, de bos sens par falhida,
cant hom lo mielh d'un joc partit no pren,
per qu'ieu vuelh may de grat l'acreissemen,
no fas dels dos; e car vos n'es cobida
petita partz et a mi grans, a vos
los laissarai, qu'es d'aver cobeitos,
car ab bon grat aurai joia complida,
enans c'ap dos, de lieys qu'es mot grazida.

Ges per bon grat ni per dos no·m compari,
Guilhem, ab vos, qu'ieu say que may n'avetz;
mas mal faretz si del pauc mi doletz,
pus em compans et yeu de vos no·m guari,
ans si doblan miey don, gaug vo·m donatz,
c'a us er tost mos dezirs acabatz:
que·l vostre gratz me play ses tot contrari
e sos doblars, mas sels dels dos ampari.

Guiraut, yeu vuelh, fe que dey sant Alari,
d'est partimen so que vos en voletz,
e prenc lo grat a mos obs, car ye·l pretz
may que ses grat aver lo poder Dari,
e dar m'ay gaug e plazer, sie·us doblatz
e vostres dos, car ye·m tenh per paguatz
ab selhs que·m prenc, et yra·m mielhs c'a Pari,
s'ap grat m'acuelh silh qu'ieu non dezampari.

Que que·m diatz, dels dos no·m camjaria
ni no·us porti enveia de bon grat,
G[uilhem], e si·l doblatz, ab cor irat
partretz de selh que·us daran tota via,
et yeu ab gaug, car be·m daran dos tans
c'a vos d‹a›n, pueis seretz del tot clamans
e neys a me·n portaretz gelozia,
e puesc chauzir aisi com vos d'amia.

Guiraut, del plag no·us valra gilozia,
si tot lo cors avetz al mieu jutjat,
qu'ieu serai mielhs grazit per bon agrat;
c'ap penre vos er razonatz fulia,
ca totz sels es, que·us donan, grans afans,
e sie·us davan mays, seri'e[n] pus grans;
e s'ieu los dos prenc que·m fa‹n› cascun dia,
pro serai ricx, ab que l'agrat y sia.

Guilhem, mon grat vuelh ab los doblans,
c'aysi serai jauzens e benanans.
Vos amparetz per sol grat joglaria:
n'Enricx o sap, el jutjamens sieus sia.

Ab mon bon grat m'anara mielhs dos tans,
Guiraut, c'a vos ab vostres dos tirans,
e n'Enricx sap que vers es la part mia,
mais al jutjar vuelh n'Elionors y sia.