Cabrit, al mieu vejaire,
vos fatz ves mi
que fals e que bauzaire,
segon qu'hom di.
Tro que mon cor n'esclaire
non aures fi
d'uells o de lenga traire.
Ar vos desfi
et er greu s'ieu piegz no·us adesc
que vos mi: e d'aital no·us mesc!
E totz jorns trobaretz mi fresc
al vostre dan, on qu'an ni tresc.

Pus en Ricau m'apella
qu'ieu fall ves lui,
l'esdig, na Peironella,
farai ses brui.
Fassa·m bon'escudella:
s'ieu dejus suy
e s'ieu sotz la maissella
ben non l'estui,
autr'assag farai bel e bon.
Fassa·m raustir un gras capon:
s'ieu no·l mange ses companhon,
vas lui ai faita trassion.

Cabrit, en joglaria
vei que tornatz
l'enjan e la bauzia
que vas mi fatz;
e non es cortezia,
que que·us digatz.
Qui·us repta de bauzia,
vos en chantatz;
mas anatz pojar en destrier,
armatz a lei de cavallier,
et er greu, s'ieu tal colp no·us fier
que·us farai dir so que·us enquier.

Ricau, ja per batalla
no m'esdirai,
ni ja agurs de gralla
non gardarai,
qu'om sans o ten a falla,
segon qu'ieu sai;
mas esdig ses baralla
vos en farai.
Fatz m'adur'un bel caval bag,
autre ros, doloiros, mal fag:
si·l bag lais e del ros m'empag,
saber poiretz qu'ie·us ai forfag.

Cabrit, el poder n'Eudiart
vos n'apell: no·us vei tan gallart
que vas mi etz de pejor art
no fon ves n'Ezengrin Rainart?

Ricau, no tengas ad erguell
s'ieu vostra batalla non vuell;
mas s'ab vostra dona·m despuell,
penhoratz n'en Pons de Capduell!