Ab fina ioia comenssa
lo vers qui bels motz assona,
e de ren no·i a faillenssa;
mas no m'es bon qe l'apreigna
tals cui mos chans non coveigna,
q'ieu non vuoill avols chantaire,
cel que tot chan desfaissona,
mon doutz sonet torn en bram.

D'amor ai la sovinenssa
e·ls bels digz: ren plus no·m dona.
Mas per bona atendenssa
esper c'alcus iois m'en veigna:
·l segles vol c'om si capteigna
segon que·s pot sempres faire
q'en breu temps plus asazona
q'a pro d'aisso don ac fam.

Bel semblan n'ai en parvenssa
que gen m'acuoill e·m razona;
mas del plus no·m fai cossenssa,
ni·s taing qu'ieu tant aut mi ceigna
ni tant rics iois m'en deveigna
on coven us emperaire:
pro fai car sol gen mi sona
ni car sofre q'ieu la am.

Mout mi fai granda temenssa
car tant pauc si abandona;
jois q'enaissi trop bistenssa
mout mostra mal'entresseigna.
Sicum li plaira mi teigna
que tant no·m fai gran mal traire:
sel so que no l'encaisona
tant no·m ten en greu liam.

Ses pechat fis penedenssa
et es tortz qui no·m perdona,
et ieu fatz long'atendensa
per tal perdon que no·m deigna.
Assatz cuig que mal m'en preigna
que perdutz es desperaire,
per c'ai esperansa bona:
pel nostre don mi reclam.

Ben es fis, de gran valenssa
mos cors, s'aqest m'abarona
per cui totz pretz creis e genssa;
e sap pauc qui so m'enseigna
que ia nuill'autra·m sosteigna,
tant bella filla de maire:
ni tant cum cels plou ni trona
non ac tal el ling d'Azam.

Als comtes mand en Proenssa
lo vers e sai a Narbona,
lai on pren iois mantenenssa
segond aqels per cui reigna
et ieu trob sai qi·m reteigna:
tal dompna don sui amaire
non ies a la lei gascona;
segon las nostras amam.