[Peire Torat]

Guiraut Riquier, si be·us es luenh de nos,
coselh vos quier e donatz lo·m breumens:
una don'ay amada lonjamens
bel'‹ab› gens huelhs et ab plazens faysos,
que m'ausi e m'esglaya
e no vol far endreg mi ren que·m playa;
et yeu fas tot so que vol ni cove,
e lieys no denha ni vol aver merce.

E soy preyatz per autra ad estros,
aytan bela et aytan avinens,
e vol me far un aital mandamens:
si laysi leys que m'es de greu respos,
que s'amor no m'estraya
per lunha res que hom de mi·l retraya;
ans ditz que m'er plazens en tota re
si·m lays d'amar l'autra que no·m rete.

Dieus prec yeu c'am vos aya
na Bel Deport que tan fort vos esglaya,
Guiraut Riquier, e vos preyatz per me,
car desamatz am e non ay nulh be.

D'en Dardasier vos puesc dir una re,
que fort ama n'Alazaytz e platz me.

[Guiraut Riquier]

Sie·us es tan luenh, mos cors es pres de vos,
en P[eir] Torat, car crezes mot valens
[................... ]
et anc no·us vi, ans ne soy volontos;
mays pero co que·m n'aya,
per negun fag mo saber no s'esmaya,
ans vos daray coselh segon ma fe
bon e lial e ad honor de me.

So qu'es pus car tenc per pus pressios
que so c'om pot aver leuieyramens,
car so que [leu] ven, va leu eysamens;
per que·us cosselh ans amar en perdos
leys que·us nafra ses playa
e que·us laysetz de l'autra que·us assaya,
car prometen vos vol tyrar a se
non per amor, mays per enjan, so cre.

Tota dona qu'es gaya
vol assayar fin aman ans que·l aya
esgardamen de far plazer en re;
mas pueys ne val cinc cens mals traytz un be.

En P[eir] Torat, mon Bel Deport me te
ses tot respieg, e per tant no·m recre.