Lo VIIII vers d'en Guiraut Riquier, l'an MCCLXXVI, en.I. iorn.X. Kl'de Marz

Cristïas vey perilhar
per colpa dels regidors,
quar entr'elhs no cap amors
ni patz ni dreitz, qu'ab tortz far
son d'autruy dreg enveyos,
e creys lurs iniquitatz,
creyssen lurs possessïos.

En aisso truep voluntos
lo pus de las poestatz;
ja non dirai dels prelatz,
qu'ilh devon governar nos
mostran via per salvar:
si·s fan don lur tanh lauzors,
e Dieus fassa·ls drech guidar.

Per sas obras deu mostrar
selh que repren las follors,
si que·l n'eschaya honors;
qu'ayssi deu hom essenhar,
quar non es maiestre bos
per sol dictar apellatz,
si·ls faitz no fa cabalos.

Aisso lays, qu'autra razos
m'o tolh, don suy apessatz:
que·ls reys truep desacordatz
que d'un voler no·n sai dos,
tant vol quascus contrastar
ab l'autre, don es paors
que Dieus tot o desampar.

Un temps volc Dieus yssausar
crestïas, e·l fon sabors
quar el pus era valors
e pessavan d'elh honrar
contra Sarrazis fellos;
ez avian entr'elhs patz
ez amor totas sazos.

Mas er es contrarïos
l'us a l'autre, que duptatz
no· y es enjans ni baratz
ni cuberta tracïos;
l'us cuia l'autr'enjanar,
mas pus greu m'es dels maiors
que·l mals pot a mais montar.

Quant l'us ve l'autre baissar,
se deurian far socors,
quar qui val a valedors;
mas estiers los vey obrar
que del creysser son gilos
e del mermar fan solatz,
qu'om val als pus poderos.

Bos reys castellas n'Anfos,
ab dreg faitz tot quant fassatz
ez auretz pro companhos.

E·l devers sia gardatz
vostres e·l ricx pretz per vos.