Be volgra de totz chantadors
Fos tan sobriers majers mos sens,
Con am mielhs e sui pus temens
De totz los autres amadors!
Breu fera pus adomniva
Chanso, onran e tenen car
Vos, que m'es de ric pretz ses par,
Dona plazen senhoriva!
Que far la degra mielhs de be,
Car aten tan auta merce.

E qui per dir sobre-lauzors
De sa dona fon anc mentens,
Don las vos et er ver dizens,
Dona! car vostra grans valors
Es tan per drech sobr'autiva,
C'ab lieis no·s pot lauzors engar!
Per que deu tot laus averar
Vostra valors esforsiva,
C'ab sel creis l'autz pretz que·us mante!
Per qu'ieu dezir de vos merce.

Aisso·m fai dir, dona, Amors
E l'onratz pretz sobre-valens
Que·us fai grazir a totas gens!
Per que una dossa legors
Es de mon ferm cor aiziva,
Totas vetz que n'auja parlar!
C'usquecx vos cuja mielhs lauzar,
Car vostre laus vers aviva
Lurs lauzors, car aisi·s cove!
Per so no·us aus clamar merce.

Tant es nobla vostra ricors,
E·l vostre nous cors covinens
Es tan bels, e l'esgartz plazens,
E tan vera·l fina colors
Fresca, natural e viva!
E tant gent sabetz dir e far
So que·us tanh et azaut onrar,
C'a tot hom'es agradiva!
Per qu'ieu non ai fin joi de re,
Mais d'atendre vostra merce.

Mot es ricx pretz, sens et honors,
Mezura e ensenhamens
Ab vos, dona! e sui jauzens
Can dezir lo vostre secors,
Que mos ferms volers m'abriva!
Mas ab tot so tem dezirar.
Doncx be·us temeria prejar
Com -- car Amors m'o esquiva,
Tant que ja no·us dirai, so cre:
Bela dona, si·us plai, merce

S'ieu vos auzes prejar de re,
Dona, be·us queregra merce.