Entre Caldes e Penedes,
pres de Santa Seglina,
lo loch que·l nobles reys cortes
me det, on pretz s'afina,
vi una toz'ab un pages,
e dezia·l la nina:
"Sabetz En Cerveri on es?
Tan l'ay cercat, mesquina!"

Ez eu can vinc demandey ly,
c'ausi que·m demandava:
"A que cercatz En Cerveri?"
Ez il, si tot plorava,
respos: "Seyner, anc mala·l vi,
que pres Belvis passava,
per que mos amics m'en feri
car sol'ab el parlava".

"Etz vos la pastora d'entan
qui·m fe tan gran falsia,
c'anava·l bestiar cercan?"
"Oc, seyner, e faria
eras tot lo vostre coman;
e ay vos quist mant dia
per tal que·y aia·l pastor dan,
pus a tort m'en feria".

"Pus per dan de vostr'amador
vengues çay, Na Bergeyra,
lo fait no tendria honor;
teynetz vostra carreyra,
qu'en nuylla femna ses amor,
falsa ne mercadeyra,
no trob'om plazer ne douçor,
pus ses precs se perfeyra".

"Seyner, lo cor avetz camjat,
gens m'avetz covidada
el loc que·l reys vos a donat;
pero no son dinada.
E vos sabetz be, per vertat,
c'om can fer femn'en bada
de tal fait l'adu volentat
don greu for'acordada".

"Na Toza, de tozas say ver
que·us pert hom ab destreyner,
ez examen ab trop plazer;
que nuylls homs no·s pot feyner
que·us pusca sobrar ne saber,
ne, can fuyetz, ateyner,
c'om no·us deu, si·us vol retener,
afluxar ne estreyner".

"Seyner, ab vos vuyll remaner,
e cuig vos en destreyner;
pus per vos perdey mon plazer,
vos lo·m rendetz, bel seyner".

"Vostres obs vos faray, per ver,
mas d'als no·us poretz feyner.
Na Toz', eu iray en poder
de l'Enfan, qu'es mon seyner".

"Si·l Vezcomtess'o pot saber,
desgrat vos n'aura, seyner".