Guiraut Riquier, pus qu'es sabens
pro a laus de vostres vezis,
diatz cal deu esser pus fis
vas bon pretz de dos entendens:
l'us a·ls fatz ses malenansa
d'amor, la bon'esperansa
en a l'autre; e diatz ses falhir
cals fa ni deu mielhs son pretz enantir.

Guilhem, sel qu'es de joy manens
e l'a per sa valor conquis,
deu esser vas pretz pus aclis
que selh qu'esper, car pensamens
ab dezir li tol esmansa
de far bos fas d'agradan‹s›a,
qu'en l'esperar ten del tot son cossir,
e·l jauzens deu en totz fatz avenir.

Guirautz, autr'es entendemens
a l'entendedor, so m'es vis,
que cascus val mais cant languis
per amor, que cant n'es jauzens;
car Amors, on mais s'enansa
vas fatz, pus torn'en mermansa
l'amans vas precx, c'adoncx moro·l dezir
e·l fag, per c'om lo solia grazir.

Guilhem, vostre razonamens
es fals e frevols e mesquis,
mais no·us notz c'anc mais no falhis.
E cals homs languitz, malsabens,
a de bos faitz remenbransa,
ni cal gay pretz desenansa?
Vos non avetz d'amor joy ni martir,
car pretz mandatz abayssar per jauzir.

Guiraut, be·us falh tot vostres sens;
veyatz cals es d'amor la fis,
com l'us e l'autre n'escarnis
can dels fatz fan acordamens.
Lo rossinhol per semblansa
us don que vieu ab alegransa
tant cant ponha en sa par covertir,
pueys son dos chant torn'en aspre rugir.

Guilhem, on mais parlatz, val mens
vostre razonamen frachis;
c'auzel non a ni joi ni ris,
mas volers leugiers e volvens,
e no·s ne pot comparansa
far ab veray'amistansa
d'amic lial, que sap son joy culhir
et on mays n'a, mielhs sap ben far e dir.

Guiraut, sos dos desenansa
aital malvad'amistansa,
com vos dizetz, e·ls fatz lag escarnir,
e Dieus e·ls sans lo·n meton en azir.

Guilhem, pus per malenansa
valetz mays, tostemps pezansa
vos done Dieu et a mi don jauzir,
c'ap joy say mielhs en totz fatz avenir.