A tornar m'er enquer al premier us
per los granz ops qu'eu vei sobraparer;
e, si mos chanz sap un pauc ves reclus,
vostr'e lo tortz e non de mon saber,
qu'entre·lz maritz non es massa solatz.
chantarai? Oc, pois al comte platz!
Aissi trairai ira de mon conort
qu'eu trametrai a·n Symon de Monfort.

S'il vol venir per querre son trabus,
no·ill lau qu'el torn a Belcaire iazer,
on escampet la veilla de son bus
si qu'anc puois iorn no fetz mas dechazer.
Ar es l'enianz de lui e dels cleriatz!
Qui·s retrairai omais es enchantatz
plus que viellz lops e no vol penre port.
Si mal l'en pren: a cui dara·i lo tort?

Qui faill en un, semblan fai que, en plus,
faillis el temps c'avia lo lezer.
E tu, qu'estas com fai ratz el pertus,
no ves lo dan que t'en pot escazer?
Bar saill enanz, esmou las mans e·ls bratz,
qu'es fortz e ferms, contra·ls desmesuratz!
Que, per effortz, son maint home estort
que autramen foran vencut e mort.

E, puois oimais em vengut a la lus,
traga·s enan sel que sabra valer,
e devedm los plans e las palus
e no·s laissm sobrar per non-caler!
Quar li frances tornon totz desarmatz,
podem saber quals es lor volontatz;
mas Dieus e Dreitz lor a camiat lor sort,
malgrat de cels que viseran l'acort.

Patz vol onrar, noirir e traire en sus
e a chascu s raison mantener;
mas questa patz q'en Symos nos adu
raub'e ausi e fai d'aut bas chaer.
Ai croi baron! Be·ous tenon enbregatz
clerc e frances ab lor enfeingna patz,
que sai venon et, autr'eis, lor acort
tornar fara de ciutat a un ort!

Ara·m digatz, Catalan escamus:
on es lo pretz que soliatz aver?
Qu'aunit viouretz tro guerra vos escus?
Veous lo bon rei que·ous soil onrat tener:
lui mal plangetz e de ren no·l veniatz
e, qui l'a mort, si dorm a vostre latz.
Qui fo ni es cel que ben s'o recort,
ades pot meillz blasmar vostre comport!

Aragones no·us fassatz plus iratz
tro·i diga mais! Mas tant vuoill que sapchatz:
tan es faillit el rei et en sa mort,
laig razonar fai en cort vostre tort!