Amics Marques, enqera non a gaire
q'ieu fi de vos coinda cansson e bona,
mas ancar n'ai en talan autr'a faire,
puois mos cosseills m'o autrej'e m'o dona;
q'a Sailforas viron miei enemic
l'anta q'ieu·s fi e·l afan e·l destric,
qu·el camp N'Albert laissetz l'elme per tasca:
si fossetz calvs tuich vos virant la rasca.

Q'ieu vos cuidei d'entrams los arssos traire,
si·us empeissi ab ma lanssa gascona
c'al encorbar, sitot vos etz gabaire,
ditz qe·l vos vi·N Guillems de Savasona,
q'en las bragas vos tengront per mendic
li canorgue e li borges de Vic.
Amics Marques, si mala gota·us nasca,
si esser pot, meillors n'aiatz a Pasca.

Ja del tornei no·us cal gabar ni feigner
c'anc non valc tant Rotlans a Serragosa:
et eu·s autrei que no m'en cal destreigner,
que mort m'agratz si·l lanssa non fos mosa,
que planamen mi detz tal colp su·l fron
que rire·n fetz En Guillem de Clarmon:
tuich vostr'amic crideron: Mataplana!,
tro lor membret qe·l man aviatz vana.

Amics Marques, si·l colp pocsetz enpeigner
mort agratz cel qe·ls maritz escogossa,
lo cortes drut qe·ls corns sap far enpeigner,
e non tem glat ni crit ni huc de gossa,
gerra ni fais, ni barrieira ni pon,
anz es plus gais que raineta en fon,
que ses aiga non poiria star sana
plus q'ieu d'amor un jorn de la setmana.

Marques, escriut port el fer de ma lansa
c'om no-fesatz non pot aver guirensa;
e pois vers es, podetz n'aver doptansa,
c'anc plus traicher de vos non pres naisensa;
neus Mos Sogres, que de Barsalones
porta las claus d'engans e de no-fes,
vas vos no·n sap lo traich d'una batzola:
per so amdoi legitz en un'escola.

Raimon de Paz, mon sirventes romansa
a·N Nas-de-Corn, e non aias temenssa
que plus volpill no·n a d'aqui en Fransa,
ni plus coart, si eu ai conoissenssa;
que cinc anz a non donet colp ni pres
en l'escut d'aur en que la dompna es,
ni en tornei non capusa ni dola,
anz ten per fol qui sas armas l'afolla.