A pauc de chantar no·m recre
per enueg dels lausenjadors,
mais forsa d'amor m'en rete
que no·m laissa virar alhors,
tan soi dels benamans la flors;
c'aisi·m te
Amors pres el fre
que de nulh alre no·m sove
mas de lieis servir a jornal:
c'aisi·m pes c'o fasso·l lial.

E doncx, s'ieu fas so que·s cove,
be m'en deu eschazer honors,
car qui pot amar mielhs de be
per dreg l'en eschai la lauzors;
e sap o midons et Amors
qu'ieu en re
vas leis no·m malme
mas car li clam, humils, merce
que·m des so que m'es pus coral:
pot esser qu'ilh so teng'a mal?

Doncx be soi fols car no·m recre
d'amar lieis, car be·m par folors,
pus autre bes no·m n'esdeve
e vei c'ades creis ma dolors,
qu'en mi sol a fag tot son cors;
per ma fe
† mielhs m'ave †
que per leis sofeira jasse
mon dan, sitot a lieis no·n cal
c'autra·m des s'amor per cabal.

E can mi paraula ni·m ve,
mi salh al cor la resplandors
dels bels huelhs, e del dos ale
mi ven mesclamens la sabors,
si qu'e la boca·m nais dossors
per qu'ieu cre
e conosc que·l be
qu'ieu dic de lieis non ai de me,
ans m'ieis de s'amor natural
que m'a ins el cor pres ostal.

E pus aquest gaug me mante,
si·m volgues far tan de socors
que·m denhes retener ab se,
gardatz s'ieu fora dels aussors!
que sos ricx pretz e sa valors
mi reve
del tot e·m soste,
e sol qu'ilh agues lo mile
de la dolor fer'e mortal,
ben agram partit per egual.

Pero si·l clamaray merce
del dan qu'ilh me fai e del mal
pus vey qu'autr'amor no m'en val.