Fis e leials e senes tot enian
aissi con cel cui a conquist amors
aurai em patz sufertatz mas dolors
qe non manei plagnen ni rancuram
e ai amat loniamen desamatz
uostre gen cors domna cui mi son datz
e pos merces ren ab uos non ualria
partirai men ieu non qe non poiria.

Anz atendrai sufren e merceian
tro qe de uos aia qalqe socors
qa tot lo meins mer latendres honors
bella donna si ben trac greu afan
qar pro ual mai rics esperars honratz
cus aunitz dos don hom non fos paiatz
per qieu serai tant amics ses feunia
tro qeus apel senes mentir amia.

Bella domna foudat fas per semblan
qe en chantan retrac uostras lauzors
ni las beutatz don sobratz la genzors
obs mi fora qeus anes oblidan
qergoils uen creis eus mermumelitatz
on plus uos uau membrant uostras beutatz
ni la ricor qes aut sobre lamia
dir nai donc mal ieu non qe mentiria.

Domna ben sai qe uostra ualor gran
maonda cors e sofrain men ricors
e si del plus podetz faire clamors
uos et amors en siatz a mon dan
e si per zo domna mochaizonatz
car no son rics sera tortz e pechatz
qar tant no ual neguna manentia
en dreig damor con fiz cor ses bauzia.
Mil uetz maurai acordat em pensant
cossius preies pois reten men paors
car oblidar me fai uostra ualors
si com hom fai dinz lo tertre cambian
qe soblidom zo don plus es membratz
qeu qant uos uei son del tot oblidatz
mas per zom plai qar failimentz seria
seu pel deman lo bel solatz perdia.

Pros contessa lo noms de sobeiratz
es loing auzitz per totz et enauzatz
per qeu non part de uostra segnoria
ni o farai aitant qant uius estia.