[Guiraut]
A·n Miquel de Castilho
et a Codolen deman
si deu saber mal o bo
de sidons a fin ayman,
si·l fa es‹g›art non-chalen
a vista de tota gen,
si selat
lo·y fa de bon grat,
mas res non l'autreya
de so que·l guerreya.
[Miquel]
Guiraut Riquier, non es bo
que·n amor ay[a] enjan,
car us non pot far son pro
de sidons ab fals semblan,
e dic vos que no m'es gen
s'amor ni son lag parven,
ni·l ris fat
es gay biaysat.
No·m play, ans m'esfreya,
amors que guerreya.
[Codolet]
Guiraut Riquier, bel e bo
m'es qu'ieu diga en chantan
mon cor de bela razo
que vos me metetz [denan].
Si midons, qu'es d'avinen,
m'esgarda am fals parven,
lo selat
li prenc ab bon grat,
si tot s'esdesleya
amors que·m guerreya.
[Guiraut Riquier]
Jes d'amor no sabetz p‹ro›,
c'ans dizetz falhimen gran,
Miquel, e no sabetz co,
qu'ieu res d'aco no·us deman.
Codolet falh yssamen,
[pero] non tan laiamen,
car lauzat
m'a l'esgart privat,
mas res no·m despleya
del deman que deya.
[Miquel]
Yeu vos ay dita razo,
Guiraut, segon mon senblan,
e vos metetz mi tenso
ab vostr'engenh c'avetz gran,
qu'ieu parli pron, qu‹i› m'enten,
del deman c'aysi conten.
Si l'amat
no·l a joy donat,
de leys cuy enveya
ben laus que·s re‹c›reya.
[Codolet]
Guiraut Riquier, oc e no
vos puesc dir al meu semblan,
mays er ay chauzit mon pro
de so c'anatz demandan:
si·s fis aman que s'enten
a pros dona conoysen,
qu'esgardat
l'aya per privat,
de fin cor l'autreya
lo joy que·l guerreya.
[Guiraut Riquier]
Miquel, ab razonar gen
cuiatz cobrir falhimen,
e·l falhat
Codolet vertat,
mays lo Viguier veya
d'ams cal pus fadeya.
[Miquel]
Guiraut Riquier, no·m repen
per vostre blasmar soven,
ni falsat
non ay lo dictat,
mas mon cor s'autreya
al Vygier c'o veya.
[Codolet]
Per l'onrat Vigier valen
vuelh venir a ensenhamen,
c'al falhat
dig‹u›a escac mat,
Guiraut, e que veya
de nos cal fadeya.