[Guiraut]
Senhe n'Enric, a vos don avantatje
d'aquestz tres jocx, pueys a·n Marques la tria:
que totz sabers sapchatz per plan coratje,
o que vulhatz fatz d'armas tota via,
o de metre e de dar larguamen
aiatz poder a tot vostre talen;
cal que prendatz, los autres vos defen.
E respondetz cascus a vostra guia.
[Enric]
Guiraut Riquier, a mi ven d'agradatje
que prenda·ls dos, c'Alissandris avia
per sos grans dos mes sotz son senhoratje
aquest mon, mays que per cavalaria
ni per sabers. Et yeu tot eyssamen
daray tals dos c'al sobrier vilzimen
que pretz a pres done restauramen,
car ses grans dos restaurar no·l poiria.
[Marques]
Vos avetz pres a ley d'ome salvatje,
car ses saber no val hom ni valria;
per qu'ieu lo prenc, senher, e·l vassalatje
lays a·n Guiraut. E vos donatz tot dia,
car yeu sabray tant far ab mon gran sen
que vos autres faretz mon mandamen
e vos farai so que·m volrai crezen
e conquerray pretz e l'amor m'amia.
[Guiraut]
Sel que non pot ni sap nulh bon uzatje
aver mas dar, senher, petit embria;
e sel que sap ses dar ab volpilhatje
enqueras mens, don Marques ditz folia
c'ab los sabers poder d'aur o d'argen
vol ajustar. Et yeu ab ardimen
farai d'armas que·m volray, vos vensen
e dechazen tals qu'er no mentauria.
[Enric]
En armas truep, Guiraut, aitant d'otratje
que qui las sec greu vieu ses raubaria,
e qui pert Dieu per l'autrui eretatje
guazanha pauc; per qu'ieu no mantenria
armas, pus hom en vieu tan folamen.
Mas ieu que fas de mans paures manen
vieurai onratz; e Marques desseben
an escolas tener en Lombardia.
[Marques]
Ja lo donars, que·us ven de nessiatje,
senes saber, senher, res no·us valria;
e d'en Guiraut dic vos que fay folatje
car se combat; qu'ieu faray ses fadia
ab mos sabers cujar a tota gen
que vos autres es bocx verayamen
et a vos dos, ab mon gran essien,
farai cujar d'ome que cabra sia.
[Guiraut]
Senher, si·m vuelh, sols conquerrai corren
tot aquest mon; doncx dar no·us val nien,
ni so saber Marques no·l mi defen.
E prec Peire d'Estanh que dreg en dia.
[Enric]
Guiraut, vos dos auray per mon argen:
Marques als platz e vos a l'ardimen.
E sobr'ayso Peire jutje breumen;
so·m pot aver bon pretz ab la part mia.
[Marques]
Pus que vos duy voletz que·l jutjamen
fassa·n Peire, yeu o vuelh eyssamen,
car el sap be qu'ieu farai sertamen
ab mo saber de vos dos a ma guia.

‹Jutjamen›
[Peire]
Guiraut Riquier, no·us tenhatz a otratje,
vos ni Marques, si tot a vostra guia
non dic jutjan. Qu'en est vostre lengatje
li conoissen mantenon tota via
c'om se fassa pros donan e meten
e conquiera honor e pretz valen.
Ges non dic mal ad armas ni a sen,
mas lo donars sobre totz sensoria.