[Guiraut]
Senhe n'Enric, us reys un ric avar
forsa de dos far e de messio,
aitan can vieu grevian tota sazo;
et un autre que sap pretz guazanhar
destrenh que res no fassa c'a pretz tanha,
tenen lo sieu; et autre que s'es totz
datz a servir sel que fo mes en crotz
forsa c'al mon servisca e remanha.
Cascus d'aquest vieu contra son plazer.
Vos e·l senher d'Alest digatz lo ver:
lo cal tratz pieitz? Mas hom lur dan non planha.
[Enric]
Guiraut Riquier, pieitz tratz, segon que·m par,
selh c'a en Dieu tota s'entensio
si contra ley fay ren que ja perdo
per negun temps mais non cuja trobar.
Que s'il prezatz, forssatz, de pretz s'estranha,
de son senhor s'albira qu'es la votz,
per que·l blasme non preza una notz.
E de l'avar es semblans que·s refranha
el ben que fay, forsatz, de son aver.
E mos fraire puesca·n dir son voler,
que sel qu'ieu dic mais d'afans l'acompanha.
[Peire]
Guiraut, pietz tray, so·m sembla, selh que dar
non pot del sieu e·l coven a maizo
son gran aver gardar ab cor felo
e non auza res c'a pretz tanha far.
Aital vida crey que pus lo guavanha
que no fay sel que dizetz que s'es rotz
de servir Dieu, car segon carn es glotz
totz homs, car Dieus nos fes d'aital limanha.
E·l ricx malvatz a calque bon saber,
car lauzengier li dizon que valer
sap entre·ls pros, qu'en aquel laus se banha.
[Guiraut]
Senher, mal trai hom forsatz de peccar
car soven n'a s'arma contrictio,
pero soven fay que sap al cor bo;
mas sos maltraitz no·s fay a comparar
ab sel del croy, que·l par que·l cor li franha
can met lo seu, don la forsa l'escotz
c'als pus paubres cuja venir desotz,
e dezira mort o Dieus que·l contranha.
E·l valens pot son afan sostener
c'om sap qu'el fes entrauzit son dever.
E·l dons d'Alest cujatz c'al peytz s'afranha.
[Enric]
Guiraut, per ren no·m podetz far cujar
que calque gaug l'avars els dos no·s do
can au dire que hom lo ten per pro.
E·l pros deu si de s'ira refrenar
car es forsatz e cor non cre·l sofranha.
E·l datz a Dieu volria en un potz
esser negatz, car pus enflatz que botz
e pieitz vieu que·ls Serrazis d'Espanha;
car nulhs conortz no·l dona bon esper
de selh de Dieu forsatz, c'a nonchaler
met si meteys e plazer non guazanha.
[Peire]
Guiraut Riquier, mielhs se deu conortar
sel que donan lo sieu cuja resso
aver, si tot non dona per razo
c'az el plassa; que·l don lo fan lauzar
a selhs que son de Frans'e d'Alamanha,
que non sabon son cor. E si greus motz
lo datz a Dieu ditz contra Luy, la dotz,
pensa trobar la merce qu'em la fanha
esta forsatz. E·l pros pert son poder,
c'om lo forsa de far son nondever,
per que tratz pieytz c'Artus, selh de Bretanha.
[Guiraut]
Senher, l'avars en totz vils faitz se banha
per ajustar aver, don es tan glotz
que·n desconoys Dieu e sos amix totz;
doncx lo forsa del dar que·l cor li franha.
Pero·l forsatz de Dieu ten bon esper
e·l pros destretz conort! E diga·n ver
l'onrables coms d'Astarac, si co·l tanha.
[Enric]
Guiraut Riquier, mens a en que·s refranha
sel c'ofen Dieus albiran qu'en la crotz
fo mes per nos: de joy es al desotz,
car dols de cors e d'arma l'acompanha;
e l'autri duy an de cors desplazer,
ses pus. E·l coms puesca·n dir son dever:
lo qual d'aquels tres a mielhs de que·s planha?
[Peire]
Guiraut, pieitz tratz lo pros qu'ins en la fanha
tomba son pretz – don au tot jorn la votz
c'om no·l preza lo valen d'una notz –
que·l ricx malvatz, car alcun laus guazanha
per los londas; e l'autre a plazer,
segon la carn, peccan en son voler.
E diga·l coms cal vid'es pus estranha.