Lo XVIII [= 17°] vers que fes Grz. Riquier, V jorns a l'intrada d'octobre, l'an MCCLXXXIIII, so fon lo dijous apres Sant Miquel.

Ancmais per aital razo
no fuy de chant embargatz,
qu'er suy de joy tant sobratz,
que mos sabers no·m ten pro
per chantar del gran plazer
qu'ieu ay, segon mon dever,
quar sai mon senhor estort
n'Aymeric, de peitz de mort
ad honor, don quays perduda
es Narbona revenguda.

E Dieus, a cuy dreitz sap bo,
sia·n grazitz e lauzatz,
e don nos acort e patz
ad honor tota sazo
de mo senhor, ses voler
del sieu poble dechazer;
e meta·ns o en tal port
que nulhs hom no·y prena tort,
quar elh no falh ad ajuda,
sol qu'om la·y deman deguda.

Qu'ancmais lunhs faitz tant no fo
per tantas gens deziratz,
ab tant de gaug restauratz,
quon qu'az onor de prezo
yssis es ab bosaber
mo senher; quar jorn e ser
per gens de quascuna sort,
suau e cridan mot fort,
n'era pregatz ab saubuda
Dieus, que l'a honor creguda.

Per qu'ieu lo prec que perdo,
per dever, quant n'er pregatz
humilmen, si perdonatz
vol esser, e garde quo
fo e quon es, quar saber
pot e deu quant pot valer
senhers que truep desacort
el sieu, sotz autruy ressort;
quar gens contra luy moguda
lo fai levar en vil bruda.

E pus d'acuzacïo
es ab lo rey escuzatz
frances, on es lialtatz,
al qual Dieus aiuda do
en totz bes, sapcha caber
el sieu grat, ab captener
degut ez ab bon conort
que paresca, que·l recort
dels senhors qu'an defenduda
Narbona e retenguda.

Le pobles deu jorn e ser
Dieu lauzar ez honrar fort
de Narbona, quar estort
a son senhor ab mouguda
de gran gauch per sa venguda.

Pros coms de Foys, mout saubuda
es d'est fach la vostr'ajuda.