A Sant Pos de Tomeiras
vengui l'autre dia,
de plueja totz mullatz,
en poder d'ostaleyras
qu'ieu no conoyssia;
ans fuy meravelhatz,
per que·l viella rizia,
qu'a la jove dizia
suau calque solatz;
mas quasquna·m fazia
los plazers que sabia
tro fuy gen albergatz;
que agui sovinensa
del temps que n'es passatz,
e cobrey conoyssensa
de·l vielha, de que·m platz.

E dissi·l: "Vos etz selha
que ja fos bergeira
e m'avetz tant trufat".
Elha·m dis, non pas felha:
"Senher, mais guerreira
no·us serai per mon grat".
"Pro femna, de maneira
tal vos vey segon teyra
qu'esser deu chastïat".
"Senher, s'eu fos leugeira
non a trop qu'en carreira
fuy de trobar mercat".
"Pro femna, per aizina
fon dich d'ome cochat".
"Senher, ans suy vezina
d'est amic non amat".

"Pros femna, d'aital toza
cum vos deu amaire
for esser dezirans".
"Senher Dieus! Per espoza
mi vol; mas del faire
no suy ges acordans".
"Pros femna, de maltraire
vos es ben temps d'estraire,
si es hom benanans".
"Senher, assatz ad aire
pogram viure; mas paire
lo sai de.vii. efans".
"Pros femna, gent servida
seretz per sos filhs grans".
"Senher, ja·n sui marida,
qu'un non n'a de.x. ans".

"Na femna descenada,
de mal etz estorta,
e peitz anatz sercan".
"Senher, ans suy membrada,
que·l cor no m'i porta
si que·n fassa mon dan".
"Pros femna, via torta
queretz, don seretz morta,
so·m pes, enans d'un an".
"Senher, ve·us qui·m coforta,
quar de mon gaug es porta,
selha que·ns es denan".
"Pros femna, vostra filha
es, segon mon semblan".
"Senher, pres de la Ilha,
nos trobes vos antan".

"Pros femna, doncx emenda
convenra que·m fassa
per vos de motz pezars".
"Senher, tant o atenda
qu'a sso marit plassa,
pueys faitz vostres afars".
"Pros femna, no·us espassa,
enquers, e dura·us massa
mahishuey vostre trufars".
"En Guiraut Riquier, lassa
suy quar tant seguetz trassa
d'aquestz leugiers chantars".
"Pros femna, quar vilheza
vos a faitz chans amars".
"Senher, de vos se deza
tant qu'als vielhs non etz pars!"

"Pros femna, de mal dire
no·m feratz temensa,
mas aisso solatz par".
"Senher, ges no m'albire
que ma malsabensa
vos saubessetz pessar".
"Pus e vostra tenensa
suy, ben devetz sufrensa
de tot ab mi trobar".
"Senher, ges no m'agensa
qu'ie·us diga ren de tensa,
ni·us fassa malestar".
"Dona, ja no poiriatz,
quar no·us puesc desamar".
"Senher, quant o fariatz,
ie·us vuelh totz temps honrar".

"Al pro Comte agensa
d'Astarac nostra tensa,
dona, qu'om deu lauzar".
"Senher, sa grans valensa
lo fai ab benvolensa
a totas gens nomnar".
"Dona, si·l sa veziatz,
saubessetz l'amparar?"
"Senher, ben auziriatz
que n'ay en cor a far".