Ab lo pascor m'es bel qu'eu chan
En estiu, a l'entran de mai,
Can par la flors sobre·l verjan,
E son reverdezit li glai!
Mout mi val pauc lo temps cortes,
Q'eu non ai joi ni non l'ades,
Ni de sa compagnia no·m lau,

Per qe d'amor an atretan
Li malvas enojos savai
Com li meillor e·l plus prezan.
Jovens s'en fuig, fraing e dechai,
E malvestatz a son luec pres
En amistat, c'amics non es
Amatz ni d'amigua no·s jau.

Ben sai qe lor es mal estan
Als moilleratz car se fan gai
Domnejador ni drudejan,
E·l guizardo qe lor n'eschai
Ditz el reprovier lo pajes :
Q'a glazi fer a glazi es
Feritz d'eis lo seu colp mortau.

Fals amador, al meu semblan,
Vostr'er lo danz e no·n pueis mai!
De gran folor es acordan
Can l'us l'autre gali'e trai!
E pos vos o aves enqes,
Drut, moiller e marit, tug tres,
Sias del pechat comunau.

El fuec major seretz creman
En la pena qe non trasvai,
Enganador fals e truan,
Al juzizi del derrer plai,
On sera totz lo mals e·l bes
Jutjatz ! e no clam ja merces
Domna c'aja drut desleiau.

Non a valor d'aissi enan
Cela c'ab dos ni ab tres jai!
Et ai n'enqer lo cor tristan,
Qe dieus tan falsa no·n fetz sai!
Miels li fora ja non nasqes
Enans qe'l failliment fezes
Don er parlat tro en peitau.

Saint salvaire, fai m'albergan
Lai el renh on mi donz estai,
Ab la genzor, si q'en baizan
Sien nostre coven verai
E qe·m do zo que m'a promes!
Pueis al jorn s'en ira conques,
Si be l'es mal al gelos brau.

Amics, diguas li·m, can la ves,
Si passa·l terme q'avem pres,
Q'ieu soi mortz, per sain Nicolau!