Coms d'Astarac, ab la gensor
dona c'om puesqu'el mon chauzir
estaretz ins en una tor
enclaus tot un an ses issir,
aman lieys d'agradatje
coralmen, et vos aziratz
per ela, o seretz amatz
per lieys, mas fel coratje
l'avretz. Pero dan no·us tenhatz,
l'una part covens que prendatz.

Guiraut, partimen de dolor
m'avetz fag, don soy en cossir;
pero yeu prenc lo mens peior
e vuelh may onrar e servir
lieys, si be s'es salvatje,
que per lieys esser deziratz,
car seria·n d'Amors blasmatz
si fels l'er'ap otratje,
pus per autra no fos lassatz
ni si·l avia brau solatz.

Senh'en coms, greu pot hom honor
far a so que·l ten en azir;
la·n vieuretz ab dobla tristor
moren ses vieur'e ses murir
ab lo peior estatje,
aman leys qu'es fela, sapchatz,
mas mens [de] mal vos for'assatz
si tenguessetz en gatje
son cor, ab qu'en fossetz iratz,
car pauc notz aman desamatz.

Laissat vos ay lo sordeior,
Guiraut, si·l ver en voletz dir,
car tan vieuretz vos en error,
pus ela no·us pot abelir
ni ren de son lengatje:
ans, pus sos vezers vos desplatz,
coven tot jorn estetz clucatz.
Et yeu ab alegratje
servirai trastot la n'en patz,
car mens d'afan cre que·m n'er datz.

Dels afans avetz lo maior,
senh'en coms, ab peys de languir,
car servetz leys, c'a deshonor
se ten vos e·l faitz peitz d'aussir;
abduy faytz breu viatje
tot l'an, e car la tormentatz,
faitz peytz que si l'ausiziatz,
c'ap serpens de boscatje
cug esser. Doncx mens mal n'agratz
sie·us ames, tant braus no·l foratz.

Guiraut, per pec razonador
vos tenc c'a lieys cargue·s martir,
car vos sostenretz la langor
e·l mal c'a lieys mandatz sofrir,
c'ap descortes barnatje
estaretz ab lieys tant de latz
que semblar n'es mal ensenhatz
e senes tot paratje;
et yeu soi tot jorn sos privatz,
per que n'ay lo mens mal, sapchatz.

Senher, d'un pauc vos desviatz,
qu'esser non podetz sos privatz,
tal vos a fel coratje;
e prec que no·n jutje·l senatz
Senher de la Yla, si·l platz.

Guiraut, soven serai mandatz
per sos obs, segon que·m comtatz,
pus non avem messatje;
e vuelh ben que·ns jutje viatz
mosenh'en Jordan, qu'es ondratz.