Lo XXI [= 20°] vers d'en Gr. Riquier, l'an MCCLXXXVI, en novembre

Jamais non er hom en est mon grazitz
per ben trobar belhs digz e plazens sos
ni per esser de bon grat enveyos,
tant es le muns avengutz deschauzitz,
quar so que sol dar pretz, grat e lauzor
aug repenre per folhia maior,
e so qu'om sol repenre e blasmar,
vey mantener ez aug per tot lauzar.

De tolre vey los poderos arditz
e·ls vey volpilhs de condutz e de dos,
e de dir ver tardius e vergonhos,
e de mentir frontiers ez yssernitz,
e lialtat no servan ni amor,
ans ab enjan s'aziran entre lhor,
ez a merce no·s volon regardar
e son cobe d'aizina de peccar.

Ab tot ditz hom que·l mun[s] es corregitz
e pus que mais no fo es valoros,
e pareys be de conoyssensa blos
qui so pessa, e trop pus qui o ditz,
qu'anc el mon mais tant no foron trachor,
ni falsari sufert, que·l gran senhor
fan de gran tort, ab elh[s], bon dreg semblar,
ez es volgutz mais qui·n sap pus obrar.

Perparan dreg, es tortz tant enantiz,
que·l mons es ples de platz e de tensos,
qu'om sec apelhs, assizas volontos,
meten lo sieu tro n'es empaubrezitz;
e caritatz no troba valedor,
don vey camjar totz jorns mal per peior,
e pot quascus en si meteys trobar
que vertatz es, si so sap cossirar.

Ab aquelh mal qu'es dels autres razitz
ez ab erguelh, em tug contrarïos
a tot dever, qu'entre mil non a dos
que·s conoscan, car bos sens no·ns es guitz
ni temem mort ni pena ni dolor
ni vergonha, ez auiatz gran folhor:
qu'apres la mort mandam so acabar
per nos, que viu no sabem comensar.

E tuch avem los mandaments auzitz
que nos a faitz Dieus, qu'es totz poderos
e totz savis, drechuriers e totz bos,
ples de merce; mas pauc n'es obezitz
e sol qu'aman, luy honran ab temor,
e l'us l'autre visquessem ses rancor,
fazen lo ben que pogram, ses mal far,
crey certamen qu'elh nos volgra salvar.

Sanctz paires Dieus, sanctz filhs, sanctz esperitz,
qu'etz caritatz, misericordïos,
e tot quant es, es nïens senes vos,
Senher, tot so de que vos etz servitz
nos faitz obrar a la vostra honor,
e de tot l'als, per la vostra doussor,
faitz nos partir e·ns o faitz azirar,
e·ns datz guida que ·ns sapcha dreg guidar.

De far l'obra son trop li dictador
de drechura e pauc li fazedor:
l'un trop escur e li autre pro clar,
mas tant sofre Dieus que·ns deu temor far.

Anc pus perdei l'onrat rey plen d'onor
de Castella n'Anfos, non ayc senhor
que·m conogues, ni·m saubes tant honrar,
que me ·n pogues de vergonha sessar.

Greu me sera si ·m coven ablasmar
un senhor mieu que solia lauzar.