Atressi com lo leos
que es tan fers quant s'irais
de son leonel quan nais
mortz ses alen'e ses vida
et ab sa voz, quan l'escrida,
lo fai reviure et anar,
atressi pod de mi far
ma bona domn'e amors
e guarir de mas dolors.

Totas las gaias sazos
venon et abrils e mais:
ben degra venir oimais
la mia bon'escarida,
trop s'es amors endormida
que·m donet poder d'amar
ses ardimen de preiar.
Ai quantas bonas honors
m'a tout temens'e paors!

Rics fora lo guizardos
e mot fis e mot verais
per que m'abellis lo fais
si sa merces no m'oblida;
qu'aissi con de nau perida
don res non pot escapar
mas per esfors de nadar,
atressi for'eu resors,
dompna, ab un pauc de socors.

Totas las bellas faissos
del mon son en vos e mais,
domna qu'anc bes no·i sofrais,
de tota valor complida;
Si fossetz d'amar ardida
ren no·i pogr'om meillurar;
ab tot so est vos ses par,
e murs e castels e tors
d'onor e de beutat flors.

Marritz mi ten e joios,
soven chan, soven m'irais,
soven magris et engrais,
c'aissi s'es e mi partida
amors joios'e marida
que ab rire et ab plorar
ab consir et ab pensar
mostra sas ricas valors
e mi entre·ls ris e·ls plors.

Domna, Dieus vos salv e·us gar
c'om ren no·i pot meillurar
en vostras finas lauzors,
mas per vos m'auci amors.

M'arm'e mon cor (mas non par)
vei ins en son cors estar,
que sai nul'autra ricors
no·m tengra ni murs ni tors.