Aissi cum selh qu'om men'al jutjamen
que es per pauc de forfag acuzatz,
et en la cort non es guaire amatz
e poiria ben estorser fugen,
mas, tan se sap ab pauc de falhimen,
no voi fugir, mas vai s'en lai doptos:
atressi m'a Amors en tal luec mes
don no m val dregz ni l'aus clamar merces,
ni del fugir no suy ges poderos.

Bona dompna, si ieu fos lialmen
en vostra cort mantengutz ni jutjatz,
lo tort qu'ieu s ai fora dreiz apellaz;
qu'ieu m'en puesc ben esdir per sagramen,
qu'ieu anc falhis, dompna cortez'e pros,
mas quar vos am e tot quan de vos es
e quar n'aus dir en manhs ricx luecs grans bes:
ve·us tot lo tort, dona, qu'ieu ai ves vos.

Per aital tort me podetz lonjamen
gran mal voler, dompna, mas ben sapchatz
que per ben dir vuelh trop mais que m perdatz
que·m guazanhetz vilan ni maldizen,
quar d'amor san tug siey fag avinen;
e pus hom es vilas ni enoios,
pueys en amor non a renda ni ses:
amar pot elh, mas d'amor non a ges
si'lh fag e'lh dig tug no son amoros.

Ben fai Amors ad honrar finamen
qu'el mon non es tant rica poestatz
que no fassa totas sas voluntatz,
e tot quan fai es trop bon e plazen;
e Dieus i fetz mot gran essenhamen
quan volc que tot fos mezur'e razos,
sens e foudatz, sol qu'az amor plagues,
e paratges no y des ren ni tolgues,
pus fin'amors si metri'en amdos.

Bona dompna, non crezatz l'avol gen
que ieu fezes de me doas meytatz,
for de mon cor que s'es en vos mudatz;
qu'en un sol loc ai ades mon enten.
E sapchatz ben qui en dos luecs s'enten
res non es meins de nesci voluntos
e ges nul temps no'm plac tal nescies
ni tal voler · anz ai amat de fes,
con fin aman deu far, ses cor felos.

Be'm lau d'Amor, quar m'a donat talen
de lieys on es pretz e sens e beutatz,
ensenhamens, conoissens'e solatz,
res no y es menhs mas que merces no'l pren
de me d'aitan que m'esguardes rizen
e que'm fezes semblan de belh respos;
ab sol aitan for'ieu guays e cortes.
E ia no vuelh pueys mens de vint e tres
del sobreplus; el sieu bel plazer fos.

Al pros Comte vuelh que an ma chansos
d'Engolesme, si vol la rend'e·l ses
que ieu conquis, que ieu vuelh per un tres:
d'a mi no falh Lunelhs ni Araguos.