Lo clar temps vei brunezir
e-ls auzeletz esperdutz
que-l freg ten destreg e mutz
e ses conort d'esjauzir
et eu que de cor consir
per la gensor res qu'anc fos
tan joios
suis qu'ades m'es vis
que folh'e flor s'espandis.

En amor son mei consir
Qu'a leis servir sui rendutz
E pois tan ric joi m'adutz
A midons o dei grazir
Que-l melhs del mon sai chauzir
Si-s fera quascus de vos volentos
Si-us o acolhis
La bela cui sui amis.

Amics li sui e serai
Aitan quan la vida-m dur
E non crezatz qu'eu-m dur
Abans me melhurarai
Qu'el pais on ela estai
Azor soplei et acli
Ab cor fi
E lai vir soven
Mos ohls tan l'am finamen.

Ai Deus tal destressa-m fai
De lei vezer tors e mur
Mas en aisso m'assegur
Per un messatgier qu'eu n'ai
Mon cor que soven la vai
E conorta-m enaissi
Que mais mi
No vol ni enten
Amic ni prec non consen.

D'aitan n'ai un bon confort
Que ves autra no-m destolh
Ni nulh'autra no m'acolh
Que mi deman dreg ni tort
Que la bona fes que-l port
A si mon cortage assis
E devis
Qu'eu non ai poder
Un'autre amor posca voler.

E s'eu vos en dic mon conort
No m'o tengatz ad orgolh
Que tan la am e la volh
Que s'era cochatz de mort
Non querri'a Deu tan fort
Que lai sus en paradis
M'acolhis
Com que-m des lezer
D'una nog ab leis jaze.
Si com eu dic ver
Mi don Deus de lei poder.