Dalfin, sabriatz me vos
mostrar raçonablamen
cant a pro domna valen
drutz cortes e pros,
cora s'eschai
que l'am plus ab cor verai
can loi a fait o enan?
Digaz me vostre scemblan.

Peirol, leus m'es lo respos,
car ben sai certanamen
c'amistatz per jauvimen
creis, et es razos
que maior jai
a druz pos sidonz o fai;
e·l granz jois, c'a senz enjan,
fai ades l'amor plus gran.

Dalfin, ben sai e conos'
c'om, pos ama finamen,
mor ades tro que·l joi pren
don plus es coitos.
E pos estai
lo desirs, c'oltra non vai;
non cre de negun aman
que pois am a fin talan.

Peirol, aizo metez jos,
c'aprop l'afaire plazen
trobam fin aman soven
moult plus volontos;
c'amors atrai
aprob lo joi grant esmai,
e menbre vos de Tristan
c'ab Yseut murit aman.

Dalfin, vers es que·il poisos
que lor det beure Bragen
la nueit per descausimen
lo fei angoissos;
mas de me sai
c'acaisonaz en serai,
e ben leu aura·i mi dan
car manteing ma razon tan.

Peirol, remaigna·il tenzos,
car vos o faitz ben parven
c'amaz falsetaz cubren:
daz vos acaisos!
Ja non creirai
que druz cortes non am mai
sidonz, pos non vai gardan
ves lei de ren que·il deman.

Dalfin, non sai,
mas bon conseil vos darai,
que si ben non l'ama tan
sevals facha·n lo scemblan.

Peirol, ben sai
e reconogut vos ai:
que leials annaz jugan
segon vostre cor truan.