Perdigon, vostre sen digatz:
Qe·us par de dos maritz gelos
L'uns ha moiller q'es bell'e pros,
Francha, cortesa e chausida!
E l'autres, laida e marrida,
Vilana, e de brau respos!
E qecs es gardaire d'amdos --
E pois tant fols mestiers lor platz
Ni aitals es lor voluntatz,
Cals en deu esser meins blasmatz

Gaucelm Faidit, ben vuoill sapchatz
Que, de dompn'ab bellas faissos
Don totz lo mons es envejos,
Qui l'a, pres de si, aizida,
Non fai ges tant grand faillida,
Si la gard'e n'es cobeitos,
Cum l'autres desaventuros,
Q'es tant de totz mals aips cargatz,
Q'en gardar no·l forssa beutatz,
Ni res, mas laidesa e cors fatz.

Perdigon, en fol razonatz
E cum auzetz anc dire vos
C'om tenga so q'es bel rescos,
Ni gart trop dompn'eissernida,
Bella, de valor complida
Doncs no la garda sos sens bos
Mas la laid'ab digz enoios
Deu gardar lo maritz senatz,
C'om non conosca sas foudatz,
Ni cum el es mal moilleratz.

Gaucelm, entre·ls nescis, agratz
Gen cobert blasme vergoignos!
Pero mal conseillatz l'espos,
Qan dizetz c'aja tal vida
Qe gart sa mal'escarida
Ni fassa d'un malastre dos!
Mieils a de gardar ochaizos
Bona dompn'on es grans beltatz,
Don par c'om sia enamoratz,
E·n deu esser meins encolpatz.

Perdigon, on plus en parlatz,
Plus desmentetz vostras chansos,
--Que gelosi'es fols ressos,
Don totz lo mons brai e crida, --
Qe hom gart dompn'grazida,
Et es laitz blasmes entre nos!
Mas l'autres gardars es razos,
Ses gelosia, e sens prezatz,
Qu'om resconda so qu'es malvatz,
E mostre so don es honratz.

Gaucelm, s'avol aver gardatz
D'avol aver etz poderos,
E no·m par ges sens cabalos
Qui pretz pert, ni joi oblida,
Per malvasa caus'aunida!
Mas qui, per bel aver joios,
Faill e s'en espert a sazos,
D'amor par que sia forsatz!
Et si d'aiso·us meravillatz
Be·m meravill si vos amatz

Totz temps duraria·ill tensos,
Perdigon, per q'ieu vuoill e·m platz
Q'al Dalfin sia·l plaitz pauzatz,
Qe·l jutge, o·ns acord'en patz.

Gaucelm, tant es vera·il razos
Q'ieu deffen, et el tant senatz,
Qe, s'a lui es lo plaitz pauzatz,
Vuoill que per lui sia jutjatz.