Atressi con Persavaus
el temps que vivia
que s'esbait d'esgardar
tant que non saup demandar
de que servia
la lansa ni·l grazaus,
et eu sui atretaus,
Miels-de-dompna, quan vei vostre cors gen:
qu'eissamen
m'oblit quan vos remir
e·us cug preiar e non fatz, mais consir.

Ab uns dous esgartz coraus
(que an fag lur via
per mos oills ses retornar
el cor, on los teing tan car
que si·l plasia
c'aitals fos mos chaptaus
dels trebaus e dels maus,
Miels-de-domna, que trac per vos soven
tan greumen)
mais am per vos morir
que d'autr'aver nuill joi, tan vos desir.

Si·l vostre durs cors fos taus
com la cortesia
que·us fai d'avinen parlar,
leu pogratz de mi pensar,
qu'anz m'ausiria
que·us pregues, car non aus,
que mon cor teing enclaus,
Miels-de-dompna, de vos en pensamen
tan jauzen
que, quant en re m'azir,
del doutz pensar pert l'ir'ab l'esjauzir.

Si com l'estela jornaus,
que non a paria,
es vostre rics pretz ses par
e l'oill amoros e clar,
franc ses felnia,
bels cors plasens e gaus,
de totas beutatz claus,
Miels-de-domna, e de bel estamen
que·m defen
lo pensar del marrir:
so no·m pot hom deloingnar ni gandir.

Bona dompna naturaus,
merce vos querria
que pogues merce trobar
ab vos, que per autr'afar
gaug no·m daria;
merce·us clam e non aus,
merces es mos cabaus.
Miels-de-dompna, si merces no·us en pren,
veramen
m'er per vos a morir,
res mas merces no·m pot de mort guerir.

Vieilla de sen e de laus,
jove on jois se lia;
vieilla de pretz e d'onrar,
jove de bel domneiar,
loing de folia;
vieilla en totz faitz liaus,
jove on jovenz es saus,
Miels-de-domna, viell'en tot bel joven
avinen,
veilla ses veillezir
e jove d'anz e de gent acuillir.

Miels-de-domna, en ren no m'en repen
se n'aten
lo joi qu'es a venir,
que bon'amor gazaingn'om ab servir.