Pauc sap d'amor qui merce no n'aten,
des qu'il consen qu'om suffra et atenda,
qu'en pauc d'ora restaura et esmenda
totz los mals traigz qu'a faigz lonc temps suffrir;
per qu'eu voll mais ab fin'amor morir
que senz amor aver lo cor jauzen:
qu'aissi·m fadet amors primeiramen.

Per Dieu, Amors, anz que·m fassatz iauzen
primeiramen m'auretz rendut esmenda
del gran mal trag e de la long'atenda
don mi faretz avanz mos jorns morir;
so qu'a vos platz mi coven a sufrir
et eu forsatz suffr'en patz e cossen,
que proar voill s'om conquer qui aten.

Sabetz, Amors, per qu'eu vos o cossen?
Car qui aten ni fai trop lonj'atenda
grieu veires pueis no ai'alcun'esmenda,
per qu'eu n'am mais l'atendenz'e·l sufrir,
qu'eu non vuoill ges desesperatz murir,
anz voill saber de vos primeiramen
si ja·m fares, Amors, nul temps jauzen.

Des aquel jorn que·us vi premeiramen,
ab cor jauzen ai estat sen esmenda
ez anc nuls hom non fes tan long'atenda
no agues conort de ren mas de morir
(que eu non posc la gran dolor suffrir)
ni homs for Dieu plus en patz non aten
quar grieu ha ben qui de mal non consen.

Bona domna, gran mal trai qui aten
mas qui conssen lo mal trag e l'atenda
[..............................]
e s'anc homs trais trebaill per lonc soffrir,
tant atendrai entre viur'e murir
tro que·m fassatz d'un doutz esgart jauzen,
qu'ab esgart venc amors primeiramen.

Miels-de-domna, no mi laissetz morir,
car mais non es maltraigz mas de suffrir;
per qu'eu volgra, s'amors vos o cossen,
qu'en saubesses qual mal trai qui aten.