Atressi con l'orifanz
que quant chai no·s pot levar
tro li autre ab lor cridar
de lor voz lo levon sus,
et eu vuoill segr'aquel us,
quar mos mesfaitz es tan greus e pesanz
que si la cortz del Puoi e lo bobanz
e l'adreitz pretz dels lials amadors
no·m relevon, jamais non serai sors,
que deingnesson per mi clamar merce
lai on jutjars ni razos no·m val re.

E s'ieu per los fis amanz
non puosc en joi retornar,
per tostemps lais mon chantar,
que de mi no·i a ren plus;
anz viurai com lo reclus,
sols, ses solatz – c'aitals es mos talanz –,
quar ma vida m'es enois et affanz
e gaugz m'es dols e plazers m'es dolors
q'eu non sui ges de la mainera l'ors
que, qui be·l bat ni·l te vil ses merce,
adoncs engraissa e meillur'e reve.

Ben sai qu'amors es tan granz
que leu mi pot perdonar
s'ieu failli per sobramar
ni reingnei com lo Magus
que dis qu'el era Iesus
e volc volar al cel outracuidanz,
mas Dieus baisset l'orgoill e lo sobranz;
e mos orgoills non es res mas amors;
per que merces me deu faire socors:
que mant loc son on rasos venz merce
e loc on dreitz ni rasos pro non te.

A tot lo mon sui clamanz
de mi e de trop parlar,
e s'ieu pogues contrafar
Fenis, don non es mais us,
que s'art e pois resortz sus,
eu m'arsera, car sui tan malananz,
e mos fals ditz messongiers e truanz
[e] resorsera ab sospirs et ab plors
la on beutatz e jovenz e valors
es, que no·i faill mas un pauc de merce
que no·i sion assemblat tuit li be.

Ma chansos er drogomanz
lai on eu non aus anar
ni ab dreitz oillz esgardar,
tan sui forfaitz e conclus,
e ja hom no m'en escus.
Miels-de-domna, que fugit ai dos anz,
ar torn a vos doloros e ploranz.
Aissi co·l sers que quant a faig son cors
torna morir al crit dels cassadors,
aissi torn eu, domn', en vostra merce,
mas vos non cal si d'amor no·us sove.

Tal seingnor ai en cui a tant de be
que·l jorn que·l vei non puosc faillir en re.

Belh-bericle, joys e pretz vos mante,
tot quan vuelh ai quan de vos me sove.