Tot atressi con la clartatz del dia
apodera totas altras clartatz,
apodera, domna, vostra beltatz
e la valors e·l pretz e·ill cortesia
al mieu senblan totas celas del mon,
per que mos cors plus de vos no·s cambia
bella domna, vos servir et onrar,
aissi com cel que pass'un estreit pon
qui non s'auza nulla part desviar.

Qui dreit cami seg de ren non desvia,
per qu'eu m'en sui del tot aseguratz
e s'ab amor deu valer liautatz,
eu sui aicel qui mieill trobar deuria
merce del plus leial amic del mon,
qu'en mi non es enjanz ni tricharia
ni·n trobaretz jamais gran, aiso·m par;
donc si·m destrui vostr'amors ni·m confon,
jamais no·m voill de servir esforsar.

Pois anc vos vi, domna, vos ai servia,
mas una res es se vos m'enganatz:
mieus er lo danz e vostr'er lo pechatz
e pois auretz del dan una partia;
ben me·l dizon tuit li savi del mon
que cel a·l dan cui es la seingnoria,
per que·m devetz, domna, del dan gardar,
que vostre sui e per vostre·m respon
per far de mi zo c'om del sieu deu far.

Domn'es de mi, qu'eu no·us auz dir amia
car non i es de ver vos l'amistatz,
per qu'eu m'en sui vergoingnos et iratz,
car d'amor es tan pauca ma jauzia
de vos que mais dezir que ren del mon:
c'aissi m'a tot amors en sa baillia
qu'enz mi non pot nuill'ochaizo trobar
ni el meu cor nuls engenz non s'escon
de que ja·m puosca amors ochaizonar.

Mas ieu consir si merces m'en valria
o genz servirs o prez o amistatz,
que ben soven trespassa volontatz
et pot esser qe merces l'en penria
de mi qui l'am mais d'altra ren del mon,
ni non es dreitz, si tot hom se fadia,
c'om se deia per tant desesperar;
que·l sieu respieg ai respieg que m'avon
amors e jois, se tot me fa tardar.