Pauc sap d'Amor qui merce non aten,
des qu'el consen
qu'om suffra et atenda,
qu'en pauc d'ora restaura et esmenda
totz los mals traigz qu'a faigz lonc temps suffrir;
per qu'eu voll mais ab fin'amor murir
que senz amor aver lo cor iauzen,
qu'aissi·m fadet Amors primeiramen.

Per Dieu, Amors, anz que·m fassatz iauzen
primeiramen
m'auretz rendut esmenda
del gran mal trag e de la long'atenda
don mi faretz avanz mos iornz murir.
So qu'a vos platz mi coven a sufrir,
et eu forsatz suffr'en patz e cosen,
que proar voill s'om conquer qui aten.

Sabetz, Amors, per qu'eu vos o cossen?
Car qui aten
ni fai trop loni'atenda
grieu veires pueis n'aia qualcun'esmenda;
per qu'eu n'am mais l'atendenz'e·l sufrir,
qu'eu non voill ges desesperatz murir,
anz voill saber de vos primeiramen
si ia·m fares, Amors, nul temps iauzen.

Des aquel iorn que·us vi premeiramen
ab cor iauzen
ai estat senes menda,
ez anc nuls hom non fes tan long'atenda
– agues conort de ren mas de murir –;
quez eu non posc la gran dolor suffrir
ni homs for Dieu plus en patz no·l aten
quar grieu ha ben qui de mal non consen.

Bona domna, gran mal trai qui aten
mas qui conssen
lo mal trag e l'atenda
[..................... esmenda]
e s'anc homs trais trebaill per lonc suffrir
tant atendrai entre viur'e murir
tro que·m fassatz d'un doutz esgart iauzen
qu'ab esgart venc Amors primeiramen.

Miels de domna, no mi laissatz murir
quar mais non es maltraigz mas de suffrir,
per qu'eu volgra, s'Amors vos o cossen,
que·n saubeses qual mal trai qui aten.