Lo nous mes d'abril comensa
apres la freidor
e l'ausel son chantador,
qu'atendut an en parvensa
lo pascor.
Miels-de-dompna, atretal atendensa
aten de vos ab joi et ab temensa,
c'apres los mals, c'ai traitz durs e cosenz,
m'en veingna bes amoros e jausenz.

C'aissi con totz l'anz agensa
per foill'e per flor,
val mais lo monz per amor;
et amors non a valensa
ni honor,
Miels-de-domna, ses vostra mantenensa,
quar de totz bes estatz grans e semensa
et en vos es beutatz, valors e senz,
mas per amor es plus valors valenz.

Tan aves de conoissensa
per que·us fan seingnor
amors, jovenz ab onor
e·us portan hobediensa
chascun jor;
Mels-de-domna, doncs voillatz c'amors vensa
vostre dur cor de bella captenenssa,
que ben sabetz que totz enseingnamenz
es en amor fis e comensamenz.

Aver coven eschazensa
a fin amador
e preingn'en pas la dolor,
greu er qui ab amor tensa
que non plor.
Miels-de-domna, en aquesta crezensa
estauc ades e fas ma penedensa
tant que·us plassa lo mieus enansamenz
de ditz ses faitz, ab doutz esgarz plasenz.

Tot atressi con Durensa
pert e Mar Major
so nom, que longeis non cor,
eissamenz pert ses faillenssa
sa color,
Miels-de-domna, denan vostra presensa
autra beutatz ses tota retenensa
ves la vostra, que tant es avinenz
qu'eissamenz creis com la lun'en creissenz.

Miels-de-domna, s'ieu sui sai vas Palensa,
m'arma e mos cors vos roman en tenensa;
e nom d'amia vos er obedienz,
ab que crezatz de sos enseingnamenz.