Deiosta·ls breus iorns e·ls loncs sers,
quan la blanc'aura brunezis,
vuelh que branc e bruelh mos sabers
d'un nou ioy que·m fruich'e·m floris,
car del doutz fuelh vey clarzir los guarricx,
per que·s retrai entre·ls enois e·ls freys
lo rossinhols e·l tortz e·l guays e·l picx.

Contr'aisso m'agrada·l parers
d'amor lonhdana e de vezis,
quar pauc val levars ni iazers
a lui ses lieys cuy es aclis,
qu'amors vol gaug e grupis los enicx,
e qui s'esiau alhora qu'es destreys,
be·m par qu'a dreit li vol esser amics.

Qu'ieu vey e crey e sai qu'es vers
qu'amors engraissa e magrezis,
l'un ab trichar l'autr'ab plazers
e l'un ab plor e l'autr'ab ris;
lo quals que·s vol n'es manens o mendicx,
per qu'ieu n'am mais so que n'ay qu'esser reys
(assatz nonre!) d'Escotz ni de Galics.

Mas ieu no sai los capteners;
mas suefre q'una m'a conquis
don reviu ioys e nays valers,
tals que denant li·m trassalis;
quar no m'enquier de dir, m'en ven destricx,
tan tem que·l mielhs lays e prenda·l sordeys:
on plus n'ai cor, mi pens: «Car no t'en gicx?».

Ha! quar si fos dels mieus volers
lo sieus rics coratges devis
desque ma dompna·m tol poders
de so de q'ieu plus l'ai requis,
mas no·l sai dir lauzenguas ni prezicx,
mas meillor cor l'ai trop que non pareys!
S'ella no·l sap, morrai m'en totz anticx.

Tant m'es dous e fis sos vezers,
pel ioy que·m n'es al cor assis,
e sobre tot lo bons espers
qu'ieu n'ai, per que m'en enriquis,
c'anc tan non fuj mais coartz ni mendicx,
ab qu'ieu la vis alques, aqui mezeys
no·m saubes far de gran paubretat ricx.

So es gaugz e ioys e plazers,
que a manhtas gens abelhis,
e sos pretz mont'a grans poders
e sos ioys sobresenhoris,
qu'ensenhamens e beutatz l'es abricx:
dompneis, d'amor qu'en lieis s'espan e creys,
plens de doussor, vertz e blancx cum es nix.

Per qu'ieu mi pens: «Ia non t'en desrazicx!»,
quan me conquis en loc on ylh mi seys
plus que si·m des Fransa lo reis Loicx.

En aquest vers sapcha Vilans Audricx
que d'Alvernhe manda qu'om ses dompneis
non val ren plus que bels malvatz espicx.