Be m'es plazen
e cossezen,
qui s'ayzina de chantar
ab motz alqus
serratz e clus,
qu'om no·ls tem ja de vergonhar.

D'aut chai em bas
qui per compas
no sap lo segle demenar,
e ben hi falh
qui tan trassalh
que non i puesc'a temps tornar.

Ben es auras
totz crestias
qu'el mezeis si vol encombrar,
ni sobre·l cays
leva tal fays
que corren no·l puesca portar.

Qu'ieu sai e sen,
mon escien,
ieu vuelh vos en tot castiar:
per trops captens
val hom trop mens
e ten hom plus vil son afar.

Mai am un ort
serrat e fort,
on hom ren no·m puesca emblar,
que cent parras
sus en puegz plas,
qu'autre las tenha ez ieu las guar.

De tot can sueil
amar me tueil
e so q'ei amat desampar,
q'eu non am re,
autrui ni me,
e vueill me totz d'amor luinar.

Daus maintas pars
me for'afars
per perdre o per gazagnar:
fers e parvenz
es mos talenz
vas m'amiga cui tenc plus car.

Qu'arreire temps
ai amat nemps
e vuelh m'en atrazach layssar:
non aura grat
qui m'a amat
ni en cor m'avia d'amar.

Qe·l reprochiers
es vertadiers
qe dels antics auzi comtar:
lo rics als rics
e l'om mendics,
qe d'eis semblan trob, a son par.

Qu'ieu ai un cor
et un demor,
et un talan et un pessar,
et un amic
vas cui m'abric
et a cuy me vuelh autreyar.

........
........
.............
amors de loing
m'agra besoing
qe pogues tener e baillar.

Si mal m'en pren
per eys mon sen,
cug a ma vida follejar;
apres ma mort
no·m fass'om tort
d'aquo qu'ieu ai ad oblidar.