Chantarai d'aquestz trobadors
que chantan de manhtas colors,
e·l pieier cuyda dir mout gen;
mas a chantar lor er alhors,
qu'entremetre·n vei cen pastors,
q'us no sap que·s monta o·s dissen.

D'aisso mer mal Peire Rogiers,
per qu'eis n'er encolpatz premiers,
car chanta d'amor a presen;
e valgra li mais us sautiers
en la gleisa o us candeliers
tener ab gran candela arden.

E·l segonz Guirautz de Bornelh,
que sembla oire sec al solelh
ab son chantar magre dolen,
qu'es chans de vielha porta-selh,
que si·s mirava en espelh,
no·s prezaria un aguilen.

E·l tertz Bernartz de Ventadorn,
qu'es menre de Bornelh un dorn:
en son paire ac bon sirven
per trair'ab arc manal d'alborn,
e sa maire escalfav'al forn
et amassav'a l'issermen.

E·l quartz de Briva·l Lemozis,
us ioglars qu'es pus querentis
que sia tro qu'en Benaven,
e semblaria us pelegris
malautes, quan canta·l mesquis,
qu'a pauc pietatz no m'en pren.

E·N Guillems de Ribas lo quins,
qu'es malvatz defors e dedins
e di totz sos vers raucamen,
per que es avols sos retins,
c'atrestan s'en faria us pins;
e l'huelh semblan de vout d'argen.

E·l seizes Grimoartz Gausmars,
qu'es cavayers e·s fai ioglars;
e perga Dieu qui·l o cossen
ni·l dona vestirs vertz ni vars,
que tals er adobatz semprars
qu'enioglarit s'en seran cen.

Ab Peire de Monzo so set,
pus lo coms de Toloza·l det,
chantan un sonet avinen;
e cel fon cortes, que·l raubet,
e mal o fes quar no·l trenqet
aquo que hom porta penden.

E l'ochens Bernatz de Saissac,
qu'anc un sol bon mestier non ac
mas d'anar menutz dos queren,
et anc pueys no·l prezei un brac,
pus a·N Bertran de Cardalhac
ques un vieil mantel suzolen.

E·l noves es En Raimbautz,
que·s fai de son trobar trop bautz;
mas ieu lo torni en nien,
qu'el non es alegres ni cautz:
per so prez'aitan los pipautz
que van las almornas queren.

E N'Ebles de Saigna·l dezes,
a cuy anc d'amor non venc bes
si tot se canta de coynden:
us vilanetz enflatz plages,
que dizon que per dos poges
lai se logua e sai si ven.

E l'onzes Guossalbo Roitz,
que·s fai de son chant trop formitz,
per qu'el cavallairia i fen;
et anc per lui non fo feritz
bos colps, tant fort non fo garnitz:
si doncs no·l trobet en fugen.

E·l dozes us veilletz lombartz,
que clama sos vezins coartz,
et elh eys sent de l'espaven;
pero us sonetz fai gaillartz
ab motz maribotz e bastartz,
e luy apell'om Cossezen.

Peire d'Alvernhe a tal votz
que non canta sus ni desotz,
e lauza·s mout a tota gen;
pero maiestres es de totz,
ab q'un pauc esclarzis sos motz,
qu'a penas nulhs hom los enten.

Lo vers fo faitz als enflabotz
a Puoich vert, tot iogan rizen.