Cui bon vers agrada auzir
de mi cosselh be qu'el escout
aquest qu'ara comens a dir,
que, pus li er sos cors assis
en ben entendre·ls sos e·ls motz,
ia non dira qu'el anc auzis
melhors ditz trobatz luenh ni prop.

De ben no fai az escarnir,
qui l'au, ans deu agradar mout,
si tot l'outracujat d'albir,
ab lur nesci feble fat ris,
tornon so qu'es d'amon de sotz;
e·l ben vezem que s'enantis
e l'esquerns resta de galop.

E per tal fai s'en bon gequir,
qu'anc esquern ni coratge estout,
si broillet, no sai vim florir;
e par d'avol respeit iardis
quan vei que la sima ni·l brotz
non gieta frucha ni techis,
e l'intrador n'eison tug clop.

Aras vuelh alres devezir:
qui d'aver say a gran comout,
ben s'en deuria far servir,
qu'en mil muegz de marabotis
non donaria doas notz,
pus a la boca venra·l fis
ni·l pestres secodra l'izop.

A quec deuria sovenir
que non agues coratg'estout
del be don nos devem iauzir,
qu'en petit d'ora es hom conquis;
e quan ven als derriers sanglotz,
no li val oncles ni cozis
ni metges ab son yssarop.

Ben deuria, pessan, morir
qui dregz huelhs guarda sus lo vout,
cossi Dieus per nos a guerir
receup mort, e pus mort aucis
selhuy que per nos venc en crotz:
tug morrem, qu'avers non gueris
negun al temps plus que fes Iop.

Mout son intrat en lonc cossir
sil que son al derrier escout,
qu'a la mort no·s pot escrimir
coms ni reis ni ducx ni marquis,
e, s'enans no·s nedeia totz
que la mortz li serre lo vis,
ben si pot, si·s vol, triguar trop.

Totz iorns vos poiria legir,
mas Dieu prec que sa grans mercis,
si de peccadors es sauvotz,
que·ns meta el sieu paradis,
lai on mes Ysac e Iacob.