En estiu, qan crida·l iais
e reviu per miei los plais
jovens ab la flor que nais,
adoncs es razos c'om lais
fals'amor enganairitz
als volpillos acropitz.

Li sordeior els savais
n'ant lo mieills e·l meins del fais:
pauc so prezon, qui·s n'irais.
Amarai mas non puosc mais,
que de tal amor sui guitz
don sai que serai trahitz.

Pres ai estat en un caslar
ab so que no·i aus estar,
e pero non puosc mudar
de mos enemics no·l gar:
ja non serai assaillitz
qu'en auta rocha es bastitz.

Si·l portiers me vol iurar
c'autre no·i lais intrar,
segur poirai gerreiar;
mas al sagramen passar
tem que serai escarnitz,
que mil vetz i sui falhitz.

Lai sui plevitz e iuratz
q'ieu non am ves autre latz,
mas d'aisso es grans pechatz
qu'eu am e non sui amatz:
totz-temps ai faitz plaitz e ditz
per qu'eu sui gen acuillitz.

A Dompnidieu qier solatz
per q'ieu sia enamoratz,
q'en aital hora fui natz
c'anc non puoc amar en patz,
e platz me car sui issitz
de la terra on fui noiritz.

Amor mi lais Dieus trobar
on ia no·m puesca fiar,
e qand ieu la tenrai car,
il pens de mi enganar,
c'adoncs mi tenc per garitz
qan mi ment tot cant mi ditz.

Assatz a a cavalgar
qui la cuida autra trobar,
c'aissi co·l cels clau la mar
non pot hom gaire trobar
que non sion camiairitz
vas drutz e vas lor maritz.